Առողջ սերունդը մեր երկրի ապագայի հիմքն է. ՀԱՕԿ
Սպորտ
Հայաստանի ապագան այսօրվա մեր երեխաների և պատանիների ձեռքերում է։
Նրանց առողջությունն ու բարեկեցությունն են մեր երկրի իրական հիմքը։ Նրանց աճի համար առողջ միջավայրի ապահովումը մեր՝ ավագ սերնդի մարզիկներիս պարտականությունն է։ Առողջ սերունդը մեր վերածննդի և հզորացման ամենակարևոր երաշխիքն է։
- Մենք պարտավոր ենք ստեղծել հնարավորություններ և միջավայր, որտեղ բոլոր երեխաներն ու պատանիները՝ անկախ սոցիալական նախադրյալներից, կկարողանան ընտրել իրենց սիրելի մարզաձևերն ու հաճախել կանոնավոր պարապմունքների։
- Մեզ խորապես մտահոգում են թմրամոլության տարածման ծավալները։ Մենք պետք է ստեղծենք մթնոլորտ, որտեղ թմրամոլությունը տարածվելու հնարավորություն պարզապես չի ունենա։ Պետք է ամենօրյա, անզիջում աշխատանքով պայքարենք պատանիների և երիտասարդության շրջանում այս արատավոր երևույթի տարածման դեմ։
- Վատ սովորությունները, որոնք վնասում են ֆիզիկական և հոգեկան առողջությանը, պետք է հաղթահարվեն՝ առողջ միջավայրը և բազմազան մարզաձևերի ընտրությունը բոլորի համար մատչելի դարձնելու միջոցով։
- Մենք պետք է ստեղծենք միջավայր, որտեղ երեխայի առողջ ապրելակերպի խրախուսումը և ապահովումը չեն մնա միայն ծնողի ուսերին։
- Ծնողական համայնքի և գործող մարզաշխարհի համագործակցությունն անհրաժեշտ է ոչ միայն մեր երկրի վաղվա չեմպիոններին կերտելու համար, այլև լայն առումով՝ մեր ապագան կառուցելու, քանի որ առողջ սերունդն է մեր երկրի ապագան։
- Կարևորագույն խնդիր է ուսանողական սպորտի զարգացումը։ Այն ոչ միայն առողջ ուսանողական միջավայրի ձևավորման խնդիր է, այլև ուղղակիորեն առնչվում է առողջ հայրեր և մայրեր ունենալու խնդրին։
Այստեղ պահանջվում է հսկայածավալ աշխատանք։
- Մենք չափազանց կարևորում ենք հայրենիքի պաշտպանության ժամանակ վիրավորում ստացած մեր ընկերների և եղբայրների՝ մարզվելու և սպորտով զբաղվելու հնարավորությունների ստեղծման գաղափարը։
Մենք ողջունում ենք արվող քայլերը՝ ֆիզիկական խնդիրներ ունեցող մեր հայրենակիցների համար մարզումների և ակտիվ կյանքի հնարավորություններ ապահովելու ուղղությամբ։
- Օլիմպիզմի սկզբունքների տարածումն ու կիրառումը պետք է դարձնենք ամենօրյա պրակտիկա՝ ներմուծելով դրանք առօրյա կյանք։ Արդար մրցակցության, ազնվության, մարդու ներդաշնակ զարգացման, արժանապատվության և հավասար պայմանների սկզբունքներն են իրական խաղաղ և առողջ հասարակության հիմքը։
Մենք՝ մարզաշխարհի ներկայացուցիչներս, առանցքային խնդիր ենք համարում առողջ սերնդի ձևավորումը։
Սա մեր ազգի և պետության զարգացման ու վերածննդի գրավականն է։ Մենք պատրաստ ենք ամենօրյա աշխատանքով, մեր փորձով, գիտելիքներով և հեղինակությամբ նպաստելու այս գործին։ Հայաստանի Ազգային Օլիմպիական կոմիտեի, ոչ օլիմպիական մարզաձևերի միության, ծնողական և ուսուցչական համայնքների, պետական և մասնավոր կառույցների համատեղ ջանքերով մենք, վստահաբար, կարող ենք հասնել առավելագույն արդյունքի։ Մենք՝ մարզաշխարհի ներկայացուցիչներս, միշտ բարձր ենք պահել մեր երկրի և ժողովրդի պատիվը, և այս գործում ևս պատրաստ ենք ներդնելու մեր ամբողջ ներուժը։
Մարզաշխարհի տարբեր սերունդների ավելի քան հազար ներկայացուցիչներ՝ հանդիսանալով տարբեր սպորտային ֆեդերացիաների անդամներ, արդեն միացել են նախաձեռնությանը։
Այս պահին ներկայացնում ենք առաջին 50 անձանց ստորագրությունները։
Հ․Գ․ Ստորագրությունների հավաքագրումը շարունակվում է, և կներկայացվեն հաջորդականությամբ:
1
2
3
4
5
1
2
3
4
5
1
2
5
