Նոր հավատ, նոր թիմ, նոր ուղի․ «Մեր ձևով» շարժումը ընդլայնում է իր գործունեությունը

«Մեր ձևով» ժողովրդական շարժումը շարունակաբար ընդլայնում է իր գործունեությունը՝ դառնալով Հայաստանի տարբեր համայնքներում բնակվող հազարավոր քաղաքացիների համախմբման հարթակ։ Շարժման հիմնարար նպատակն է նոր ոգի, նոր հավատ և նոր տեսլական բերել Հայաստանի ապագային՝ իրական ծրագրերով և գործնական քայլերով։

Վերջին մեկ ամսվա ընթացքում «Մեր ձևով» շարժումը նախաձեռնել է մի շարք սոցիալական և կրթական նախաձեռնություններ՝ ուղղված Հայաստանի երիտասարդության ներուժի բացահայտմանը։ Շարժման աջակցությամբ մեկնարկել է սպորտի, գիտության և արվեստի ոլորտներում երիտասարդ տաղանդներին աջակցելու նախագիծը, որի շրջանակներում հատուկ ուշադրություն է դարձվում նրանց կրթական հնարավորությունների ընդլայնմանը և միջազգային հարթակներում ներկայացմանը։

Շարժման գործունեության արդյունքում արդեն ավելի քան 4000 քաղաքացիներ են միացել նախաձեռնությանը՝ իրենց մասնակցությամբ ձևավորելով նոր հասարակական շարժում, որը նպատակ ունի համախմբել հայրենասեր և գործուն մտավոր ու ստեղծագործ ուժերին։ Շարժման ծրագրերից մեկը վերաբերում է բազմազավակ ընտանիքների համար պետական աջակցության նոր մեխանիզմների մշակմանը, որը կնպաստի ժողովրդագրական և սոցիալական խնդիրների հաղթահարմանը։

Չնայած իշխանական տարբեր շրջանակների կողմից գործադրվող վարչական և քաղաքական ճնշումներին՝ շարժման անդամները շարունակում են այցելել մարզեր, հանդիպել բնակիչների հետ, լսել նրանց խնդիրները և ներկայացնել լուծման ուղիներ։ Այս հանդիպումների ընթացքում ձևավորվում են նաև շարժման առողջապահական բարեփոխումների աշխատանքային խմբերը, որոնք շուտով կներկայացնեն համակարգային բարեփոխումների առաջարկներ։

Շարժման նախաձեռնող Սամվել Կարապետյանի տասնամյակների գործարար և կառավարման փորձը շարժման համար լուրջ առավելություն է, քանի որ թույլ է տալիս համակարգված և արդյունավետ մոտեցում ցուցաբերել թե՛ տնտեսական, թե՛ կառավարման ոլորտներում առկա մարտահրավերներին։

Հոկտեմբերի սկզբին շարժումը բացել է իր երկու մարզային գրասենյակները՝ Գյումրիում և Սևանում, ինչը նշանավորում է տարածաշրջանային աշխատանքի նոր փուլ։ Շարժմանը միանում են տարբեր մասնագիտությունների ներկայացուցիչներ՝ տեխնոլոգներից մինչև ուսուցիչներ, բժիշկներից մինչև ֆերմերներ։

Հոկտեմբերի 9-ին, Երևանի «Կոնգրես» հյուրանոցի դահլիճում, շարժման աջակցությամբ կայացել է «Կանայք միմյանց համար» ֆորումը, որի նպատակն էր քննարկել հայ կանանց առջև ծառացած սոցիալական, տնտեսական և առողջապահական խնդիրները։ Ֆորումի ընթացքում մասնակից կին մասնագետները կիսվել են աշխատանքի և ընտանիքի համատեղման փորձով, խոսել են մայրության, ժողովրդագրության և կարիերայի զարգացման կարևորության մասին։

«Դեմոգրաֆիկ առումով առաջին օղակները, որ մեզ կարող են փրկել կոլապսից, հենց կանայք են՝ մայրերը։ Այդ պատճառով ֆորումը հենց նրանց համար է»,– նշել է «Մեր ձևով» շարժման անդամ Լենա Մաթևոսյանը։

Հոկտեմբերի 11-ին, ժամը 11:30-ին, մայրաքաղաքի «Փրայմհոլ» համալիրում կկայանա «Մեր ձևով» շարժման առաջին հաշվետու ժողովը, որի ընթացքում շարժման համակարգող խորհուրդը կներկայացնի արդեն իրականացված նախաձեռնությունները, հաշվետվությունը կատարված աշխատանքի մասին և կքննարկի առաջիկա ծրագրերն ու նոր ուղղությունները։

«Մեր ձևով» շարժման կայուն աճն ու ընդլայնվող գործունեությունը փաստում են, որ Հայաստանում ձևավորվում է նոր հանրային ուժ՝ հիմնված ոչ թե խոսքերի, այլ գործի վրա։ Շարժման գաղափարախոսությունը՝ միասնության, աշխատանքի և ազգային արժանապատվության վերականգնման գաղափարը, դառնում է հազարավոր մարդկանց նոր հույսը։ Այն արդեն իսկ դուրս է գալիս Երևանի սահմաններից և քայլ առ քայլ դառնում է համազգային շարժում՝ մեր ձևով, մեր ուժով, մեր ապագայի համար։