Տհաճ անակնկալներ Հրազդանի քաղաքապետի ընտրություններում

Orer.am-ը գրում է .

Հրազդանի քաղաքապետի ընտրությունները դեռ չսկսված՝ բավականին տհաճ անակնկալներ են բերել թեկնածուներից մեկին՝ այս անգամ «Քաղաքացիական պայմանագիր» կուսակցությունը ներկայացնող Սասուն Միքայելյանին: Քիչ էր, որ ՀԱԿ-ի իր նախկին գործընկերները հրաժարվեցին տրամադրել իրենց տեղերն ընտրական հանձնաժողովներում, հիմա էլ արդեն նրա վաղեմի մարտական ընկերները, ի դեմս ԵԿՄ-ի, երես են թեքել նրանից՝ պաշտպանելով գործող քաղաքապետին:

Իհարկե, ոմանց նման անվստահությունը պարոն Միքայելյանի հանդեպ կարող է զարմանալի թվալ, սակայն ոչ նրանց համար, ովքեր որոշակի ճանապարհ են անցել նրա հետ: Գուցե այս անվստահությունն առաջացել է Սասուն Միքայելյանի քաղաքական նախասիրությունների չափից դուրս փոփոխականության պատճառով:

Հետաքրքիր է, որ անվստահություն կա ոչ միայն իշխանական շրջանակներում, այլև ընդդիմադիրների մոտ: Իշխանության մասով ամեն ինչ պարզ է: Չէ՞ որ նա ժամանակին, լինելով Սերժ Սարգսյանի ամենամտերիմ անձանցից մեկը, բազմաթիվ ու բազմաբնույթ աջակցություն է ստացել նրանից: 2008թ նախագահական ընտրություններին լինելով ներկայիս նախագահի շտաբի կարկառուն ներկայացուցիչներից մեկը՝ ընթացքում սխալ կանխատեսելով օրվա ընդդիմության հնարավորությունները, ճամբարափոխ եղավ: Ընդ որում՝ այդ խառը ժամանակահատվածում առնվազն երկու անգամ անձամբ Սերժ Սարգսյանին հավաստիացրել է, որ չի կարող դավաճանել վերջինիս (հավաստիացումները եղել նաև տղայական մակարդակով):

Թե ինչ արժեին այդ խոստումները, բոլորին են հայտնի: Ասում են՝ դրանով էր պայմանավորված, որ Սերժ Սարգսյանը մինչ օրս էլ չի ներել իր նախկին «մարտական ընկերոջը»: Ինչպես երևում է, չեն ներում նաև երկրապահները: Ինչ վերաբերում է ընդդիմադիր ուժերի անվստահությանը, ապա այն կապված է քաղաքական շրջանակներում գոյություն ունեցող կասկածների հետ, որ Սասուն Միքայելյանի ներկայիս կուսակցությունը քողարկված կերպով առնչվում է իշխանական վերնախավի որոշակի խմբավորմանը: