Մինչ նախարարները հասկանան՝ ինչպես կանխել վիրուսի տարածումը դպրոցում, ուստարին կավարտվի

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հայաստանում ահագնացող A(H3N2) տիպի գրիպային վարակը հատկապես լայն տարածում ունի դպրոցներում․ ՍՇՎ-ի հետևանքով արձանագրվել է բացակայությունների նշանակալի աճ։ Ըստ պաշտոնական տվյալների՝ նոյեմբերի վերջին դպրոցներում գրանցված 55 635 բացակայություններից 8 064-ը եղել են սուր շնչառական վարակների պատճառով, ինչը կազմում է մոտ 14.4%։ Մասնագետներն ընդգծում են, որ հիվանդացության 80%-ը բաժին է ընկնում 0–18 տարեկաններին, այսինքն՝ դպրոցահասակներին։

Վիրուսը բնորոշվում է 39–40°C բարձր ջերմությամբ, ընդհանուր թուլությամբ, մկանային ու հոդային ցավերով, հազով։ Սակայն ծնողներից շատերը, գտնվելով դժվար իրավիճակում, շարունակում են երեխաներին դպրոց ուղարկել, որպեսզի նրանք չբացակայեն ամփոփիչ գրավոր աշխատանքներից։

Մոտ երեք շաբաթ առաջ ծնողները կոչ էին անում նախարարությանը՝ անցնել հեռավար ուսուցման։ Այդ ընթացքում, սակայն, թե՛ առողջապահության և թե՛ ԿԳՄՍ նախարարությունները վստահեցնում էին, որ իրավիճակը վերահսկելի է, և նման քայլ անհրաժեշտ չէ։ Այսօր արդեն Առողջապահության նախարարությունը հայտարարում է, որ այն դասարաններում, որտեղ բացակայությունների թվաքանակը գերազանցում է 20%-ը, ուսուցումը կանցկացվի հեռավար ձևաչափով։

Սակայն հարց է առաջանում․ արդյո՞ք սա արդյունավետ լուծում է, եթե ծնողները հաճախ ստիպված են հիվանդ, դեռ ամբողջությամբ չապաքինված երեխաներին դպրոց ուղարկել՝ թեմատիկ աշխատանքները բաց չթողնելու նպատակով։ Նույնը վերաբերում է դպրոցներում ներդրված «ֆիլտրին», ըստ որի՝ վատ ինքնազգացողությամբ երեխային ջերմաչափում են, և եթե ջերմությունը բարձր է, ուղարկում են տուն։ Արդյո՞ք բոլոր երեխաներն են միանգամից բարձրաձայնում, որ լավ չեն զգում. եթե դասարանում մեկն էլ լինի, որ «համարձակություն չունենա» ասել իր վատ զգալու մասին, ապա մի քանի երեխա կարող է վարակվի։ Չնայած, եթե հիշենք, թե սկզբանական շրջանում պետության ղեկավարը քովիդից պաշտպանվելու ինչ տարբերակ էր առաջարկում, ապա հիմա պայքարի այս ձևն էլ է արդարացված։

Ընդ որում, H3N2-ի առաջին դեպքերը Հայաստանում արձանագրվել էին 45-րդ համաշխարհային համաճարակաբանական շաբաթում՝ նոյեմբերի երկրորդ կեսին։ Այսինքն՝ արձագանքը, ըստ էության, ուշացել է։ Հիմա ձմեռային արձակուրդներին ընդամենը 11 օր է մնացել, և մինչ նախարարությունները կհստակեցնեն հեռավար ուսուցման կազմակերպման ձևերը, մեծ հավանականությամբ ուսումնական տարվա ընթացքն արդեն փաստացի կավարտվի։

Նարե Գնունի

Հետևեք մեզ՝ այստեղ