Ցրտահարության հետեւանքով վնասվել է Արտաշատի տարածաշրջանի ծիրանենիների ավելի քան 90 տոկոսը
Հասարակություն
Վերջին օրերին հանրապետությունում օդի ջերմաստիճանի կտրուկ նվազելու հետեւանքով Արտաշատի տարածաշրջանում ծաղկած ծիրանենիները վնասվել են ավելի քան 90 տոկոսով, իսկ Արարատի եւ Մասիսի տարածաշրջաններում` մինչեւ 70 տոկոսով: Այս մասին «Արմենպրես»-ի թղթակցի հետ զրույցում նշեց Արարատի մարզպետարանի աշխատակազմի գյուղատնտեսության եւ բնապահպանության վարչության պետ Հայկազ Տերտերյանը` հավելելով, որ պտղատու մյուս ծառերը` սալորենիները, դեղձենիները, հաղարջենին, որոնք դեռեւս ծաղկել էին մասնակիորեն, լուրջ վնասներ չեն կրել:
Տերտերյանն, անդրադառնալով գյուղացու սպասվելիք բերքի նման մեծ կորստին, նշեց, որ ծիրանի այգիները մեր հանրապետությունում ռիսկային գոտում են գտնվում: «Մեկ այգեգործն ունենում է մի քանի հեկտար միայն ծիրանի այգի, ինչը բնության քմահաճույքից ելնելով վնաս է հասցնում իր ողջ տարվա եկամուտին: Դրա համար մենք գյուղացիներին խորհուրդ ենք տալիս ունենալ տարբեր պտուղների այգիներ, որի պարագայում ցրտահարությունը, կարկտահարությունն ու բնության այլ անակնկալիները միանգամից ջուրը չեն գցի իր ողջ տարվա եկամուտն ու չարչարանքը»,- ընդգծեց վարչության պետը:
Մեծ վնասներ չեն կրել նաեւ սածիլները, որոնք առայժմ տնկված են ջերմոցներում կամ գտնվում են մոմլաթե ծածկի տակ:
Տերտերյանն ասաց նաեւ, որ վնասի չափերը կարող են եւ փոխվել, եթե ջերմաստիճանը կրկին լինի բացասական:
Լիլիթ Մաճկալյան
1
2
3
4
5
1
2
3
5
1
2
3
4
5
