ԱՄՆ-ն կասեցրել է Մեծ Բրիտանիայի հետ տեխնոլոգիական համաձայնագիրը․ FT

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Միացյալ Նահանգները կասեցրել է Մեծ Բրիտանիայի հետ տեխնոլոգիական համաձայնագրի իրականացումը՝ Վաշինգտոնում Լոնդոնի հետ առևտրային բանակցությունների առաջընթացի վերաբերյալ դժգոհության աճի ֆոնին։ Այս մասին հաղորդում է Financial Times (FT)-ը՝ հղում անելով Մեծ Բրիտանիայի պաշտոնյաներին։

Սեպտեմբերին կնքված «տեխնոլոգիական բարգավաճման» մասին պայմանագիրն ուղղված է երկու երկրների միջև համագործակցության խթանմանը արհեստական բանականության (ԱԲ), քվանտային հաշվարկների և միջուկային էներգետիկայի ոլորտներում։ Պարբերականի տվյալներով՝ բրիտանացի պաշտոնյաները հաստատել են, որ ԱՄՆ-ն «անցյալ շաբաթ կասեցրել է համաձայնագրի գործողությունը»։ Նրանցից մեկի խոսքով՝ «Թրամփի վարչակազմը Մեծ Բրիտանիայից զիջումներ է ակնկալում այնպիսի ոլորտներում, որոնք դուրս են տեխնոլոգիական գործընկերության շրջանակներից»։

Երկկողմ առևտրային բանակցություններ են վարվում այն պահից ի վեր, երբ մայիսին կողմերը համաձայնագիր են կնքել ԱՄՆ նախագահ Դոնալդ Թրամփի՝ բրիտանական ապրանքների նկատմամբ կիրառած ամենախիստ մաքսատուրքերը մեղմացնելու վերաբերյալ։ Բանակցությունների ընթացքին ծանոթ աղբյուրները տեղեկացրել են, որ ամերիկացի պաշտոնյաները «էլ ավելի են հիասթափվում այն հարցում, որ Բրիտանիան չի ցանկանում լուծել այսպես կոչված ոչ սակագնային արգելքների հարցը, ներառյալ՝ սննդամթերքի և արդյունաբերական ապրանքների իրացումը կարգավորող կանոններն ու դրույթները»,— ասված է հրապարակման մեջ։

Financial Times-ը հիշեցնում է, որ Վաշինգտոնը վաղուց է ձգտում նրան, որ Լոնդոնը ճանաչի սննդամթերքի և գյուղատնտեսական արտադրանքի վերաբերյալ ամերիկյան ստանդարտները։

Հետևեք մեզ՝ այստեղ