Արտյոմ Հակոբյան. «Արամեի կողմից անշնորհակալ դրսևորում եմ համարում դա»

Blognews.am-ը գրում է .

Արամեն և Արտյոմ Հակոբյանը տևական համագործակցությունից հետո դադարել են միասին աշխատել։ Արամեն իր հարցազրույցում նշել է, որ Արտյոմն ընդամենը ադմինիստրատիվ աշխատանքով է զբաղվել, ինչն առաջացրել է վերջինիս դժգոհությունը։ Արտյոմն իր ֆեյսբուքյան էջում թվել է, թե ինչ աշխատանքով է զբաղված եղել համագործակցության ընթացքում։

 «Անշնորհակալ դրսևորում եմ համարում Արամեի կողմից նման արտահայտությունը իմ աշխատանքի վերաբերյալ՝ նա ընդամենը ադմինիստրատիվ աշխատանքով էր զբաղված: Այո՛, դա վիրավորական է ինձ համար, քանի որ 4 տարիների ընթացքում ես արել եմ այն ամենը, ինչ մտնում էր իմ պարտականությունների մեջ (ըստ մեր սկզբնական պայմանավորվածության) և դեռ շատ ավելին (մեր պայմանավորվածությունից դուրս), քանի որ համարել եմ,որ մեկ ընդանուր գործ ենք անում, և կապ չունի, թե ունեմ նման պարտավորություն թե ոչ: Չեմ կարծում, որ ադմինիստրատորի պարտականություն է՝ երգչի համար անվճար տեսահոլովակներ նկարահանելը, բոլոր տեսակի բանակցություններ վարելը, երգչի զրոյական վիճակում գտնվող սոցցանցերի կայացումը, Youtube-յան պաշտոնական ալիք ստեղծելը (որն այսօր հայ երգիչներից շատերի ալիքներից ուժեղ է), բոլոր լրատվամիջոցների հետ կապեր պահելը և հարցազրույցներ տալը, պատշաճ կերպով բոլոր համերգների բանակցությունները երաժշտական խմբերի հետ բանակցությունները և փորցերի կազմակերպումը, ֆոտոշարքերը, երգեր գտնելը, ձայնագրությունների կազմակերպումը, բոլոր հյուրախաղերի պատշաճ կազմակերպումը և երգչի պատշաճ ներկայությունը, ձայնասկավառակների թողարկումը և պրեզենտացիաների կազմակերպումը, հոնորարների բանակցությունները և էլի շատ բան, որոնք ուղղակի արվել է այս տարիների ընթացքում, հաշվի չառնելով, որ գոյություն ունեն որոշակի նախնական պայմանավորվածություններ, քանի որ, կրկնում եմ, ինձ համար կարևոր էր մեր աշխատանքի արդյունքը, որն, ի դեպ, դրական եմ համարում։ Մեր այս համագործակցության մեջ ևս մեկ մարդ կար, իմ գործընկերը՝ «Positive Production» ընկերության տնօրենը, որը այս տարիների ընթացքում մի քանի տասնյակ համերգային շրջագայություններ է կազմակերպել Ռուսաստանի և Եվրոպայի շատ քաղաքներում: Եվ, բնականաբար, Արամեն եղել է այդ բոլոր համարգների առաջին մասնակիցը»,- նշել է նա:

BlogNews-ն Արտյոմի հետ զրուցել է՝ պարզելու, ի վերջո, ի՞նչն էր համագործակցության դադարեցման պատճառը և ո՞ւմ որոշումն էր դա։ «Ոչ մի տեսակի կոնֆլիկտ ընդհանրապես չենք ունեցել։ Շատ հանգիստ աշխատել ենք և շատ հանգիստ որոշել ենք դադարեցնել համագործակցությունը։ Ինձ ուղղակի դուր չեկավ, որ Արամեն նշել էր, թե ես պարզապես ադմինստրատիվ աշխատանքով եմ զբաղված եղել 4 տարի։  Ուղղակի թյուր կարծիք էր ձևավորվել, որ ես 4 տարի զբաղվել եմ բացառապես ադմինստրատիվ աշխատանքով, իսկ ես համարում եմ, որ ադմինստրատիվ աշխատանքը պատրաստի տեսահոլովակի սկավառակը հեռուստատեսություն հասցնելն է։ Ես 4 տարիների ընթացքում բավականին ծավալուն աշխատանք եմ արել և համարում եմ, որ իմ կատարած աշխատանքը շատ ավելի մեծ և լուրջ է, քան պարզապես ադմինիստրատիվ գործն է, դա էր պատճառը, որ ես որոշեցի անդրադառնալ այս հարցին»,- նշեց երգչի նախկին մենեջերը։

Դիտարկմանը, որ հենց այնպես չեն որոշում դադարեցնել համագործակցությունը, Արտյոմն արձագանքեց. «Ես չեմ մեկնաբանում։ Դա մեր համատեղ որոշումն էր։ Այո՛, հենց այնպես որոշել ենք եզրափակել 4 տարվա աշխատանքը։ Ամեն դեպքում, ես շատ հետաքրքիր եմ համարում այս տարիների համագործակցությունը Արամեի հետ»։

Անդրադառնալով գրառման այն հատվածին, որ Արամեի համար անվճար տեսահոլովակներ է նկարահանել՝ ռեժիսորը նշեց. «Արամեի այն տեսահոլովակները, որոնք ինքն է նկարահանել, տիտրերում գրված է՝ ռեժիսոր Արտյոմ Հակոբյան։ Ես համարել եմ, որ դա եղել է մեր համագործակցության մի մասը և արվել է մեր ընդհանուր աշխատանքը բարելավվելու համար»։

Հետգրությամբ Արտյոմը նշել է, որ Արամեի կողքին գտնվող մարդկանցից ոմանք իրենց պահվածքով նրան սովորեցրել են, որ բոլորը, չգիտես ինչու, նրան պարտական են: Միևևնույն ժամանակ, Արտյոմը մեզ հետ զրույցում ասաց, թե նեղացած չէ։

Նյութը՝ Ամալյա Հովհաննիսյանի