Կարևոր՝ Արցախից տեղահանվածների համար

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կառավարությունը դեկտեմբերի 25-ին կայացած նիստում հավանություն է տվել Արցախից բռնի տեղահանված անձանց ինքնազբաղվածության խթանման ծրագրին։

Որոշման հիմնավորման համաձայն՝ նախաձեռնությունը միտված է արցախցիների տնտեսական կայունացմանը, արտագաղթի և արտագնա աշխատանքի ռիսկերի նվազեցմանը, ինչպես նաև նոր աշխատատեղերի ձևավորմանը։

Ծրագրով նախատեսվում է աջակցություն տրամադրել այն տեղահանված անձանց, ովքեր բնակարանային ապահովման պետական աջակցության ծրագրերի շահառու են, ունեն համապատասխան հավաստագիր, Հայաստանի Հանրապետությունում որևէ գործունեությամբ զբաղված չեն և վերջին երեք ամիսների ընթացքում հարկ վճարող չեն եղել։ Սահմանված է, որ ծրագրին հնարավոր է մասնակցել միայն մեկ անգամ, և յուրաքանչյուր ընտանիքից կարող է ընդգրկվել միայն մեկ շահառու։

Ինքնազբաղվածության ապահովման նպատակով աջակցությունը նախատեսվում է մի քանի ուղղություններով։ Դրանք ներառում են ձեռնարկատիրական գործունեության մեկնարկի և իրականացման համար անհրաժեշտ խորհրդատվական աջակցություն, բիզնես ուսուցում, գործարար ծրագրի մշակում և գործունեության ուղեկցում մինչև 12 ամիս ժամկետով, ինչպես նաև գործարար ծրագրերի իրականացման համար դրամաշնորհների տրամադրում։

Ծրագրի շրջանակում նախատեսվում է կազմակերպություններին վճարել յուրաքանչյուր շահառուի բիզնես ուսուցման համար մինչև 300 հազար դրամ, իսկ 12 ամիս տևողությամբ բիզնես ուղեկցման համար՝ ամսական 60 հազար դրամ՝ միջինում 10 ժամ խորհրդատվության հաշվարկով։

Շահառուներին ձեռնարկատիրական գործունեություն իրականացնելու նպատակով կտրամադրվի դրամաշնորհ՝ գործարար ծրագրով նախատեսված գումարի 70 տոկոսի չափով, սակայն առավելագույնը՝ 2 միլիոն դրամ։ Միևնույն ժամանակ շահառուները կարող են ներգրավել նաև սեփական կամ այլ օրինական աղբյուրներից ստացված լրացուցիչ միջոցներ՝ կապիտալ ծախսերի կամ տարածքի վարձակալության համար։

Նախատեսվում է, որ ձեռնարկատիրական գործունեության մեկնարկից հետո 7 աշխատանքային օրվա ընթացքում շահառուին կփոխանցվի դրամաշնորհի գումարի 50 տոկոսը, իսկ հիմնական միջոցների ձեռքբերման դեպքում՝ մինչև 70 տոկոսը՝ համապատասխան փաստաթղթերի առկայության պայմանով։ Դրամաշնորհի մնացած մասը կփոխանցվի գործունեության մեկնարկից մեկ տարի անց։

Բացի այդ, առաջարկվում է, որ եթե ձեռնարկատիրական գործունեությունը 12 ամսից հետո շարունակի գործել ևս 6 ամիս և տարեկան շրջանառությունը կազմի առնվազն 3 միլիոն դրամ, շահառուին տրամադրվի հիմնական միջոցների ձեռքբերման ծախսերի փոխհատուցում՝ մինչև 1 միլիոն դրամի չափով՝ համապատասխան հիմնավորող փաստաթղթերի ներկայացման դեպքում։

Ծրագրի իրականացմամբ ակնկալվում է ինքնազբաղվածության հնարավորություն ստեղծել շուրջ 200 տեղահանված անձի համար՝ նպաստելով նրանց սոցիալ-տնտեսական կայունացմանն ու արտագաղթի մակարդակի նվազեցմանը։

Հետևեք մեզ՝ այստեղ