Թուրքիան ընկղմվում է անորոշության մեջ.

Թուրքիան քաղաքական իրարանցման հեռանկարի առաջ է կանգնել երեկ անցկացված խորհրդարանական ընտրություններից հետո, երբ իշխող «Արդարություն և զարգացում» կուսակցությունը կորցրեց խորհրդարանական մեծամասնությունը՝ հարված հասցնելով նախագահ Ռեջեփ Թայիփ Էրդողանի հավակնություններին, գրում է Business Insider-ը:

Նոր նախագահական հանրապետություն ստեղծելու նպատակով սահմանադրական փոփոխություններ անելու համար անհրաժեշտ երկու-երրորդ ձայները ստանալ ակնկալող ԱԶԿ-ն տապալվեց՝ չստանալով անգամ պարզ մեծամասնությունը:

Հիշեցնենք, որ վերջին 12 տարիներին իշխող ԱԶԿ-ն կստանա խորհրդարանի 550 տեղերից ընդամենը 256-ը: Նախորդ խորհրդարանի համեմատ՝ ԱԶԿ-ն կորցրել է 9 տոկոսը: Կառավարություն ձևավորելու համար նա ստիպված կլինի կոալիցիա կազմել մեջլիս մտած մյուս 3 քաղաքական ուժերից մեկի հետ:

«Մեր ազգի տեսակետն ամեն ինչից վեր է: Ես հավատում եմ, որ արդյունքը, որը մեր կուսակցություններից ոչ մեկին հնարավորություն չտվեց միայնակ իշխող կուսակցություն դառնալ, առողջ և իրատեսորեն կընդունվի կուսակցությունների կողմից»,- Business Insider-ը մեջբերում է Էրդողանի խոսքերը:

Թուրքական լիրան ռեկորդային անկում է գրանցել՝ հասնելով 1 դոլարի դիմաց 2.8-ի:


Այս անկայուն արդյունքը կարող է նաև ազդել Արևմուտքի մայրաքաղաքների վրա, որոնք ՆԱՏՕ-ի անդամ Թուրքիային համարում են քաղաքական կայունության կարևոր կղզի՝ Միջին Արևելքի սահմանին:

Էրդողանը Թուրքիայի ամենահեղինակավոր ժամանակակից առաջնորդն է, որը, սակայն, հաճախ չի գնում բանակցության ու փոխզիջման: Նա հույս ուներ, որ ԱԶԿ-ն ջախջախիչ հաղթանակ կտանի, ինչը հնարավորություն կտա փոխել Սահմանադրությունն ու ստեղծել ավելի ուժեղ՝ ԱՄՆ-ի նման նախագահություն:

Վճռորոշ էր նաև քրդամետ ընդդիմադիր կուսակցության հաջողությունը: Հիշեցնենք, որ քրդամետ «Ազգերի ժողովրդավարություն» կուսակցությունը պատմության մեջ առաջին անգամ կարողացել է շրջանցել 10 տոկոսանոց արգելքն ու հայտնվել խորհրդարանում: