Ռուսաստանին եւ Թուրքիային հաշտեցնելու Բաքվի փորձերը դատապարտված են ձախողման

 Ռուսաստանի եւ Թուրքիայի հարաբերությունները կարգավորելու համար որեւէ երկրների միջնորդական բոլոր փորձերը դատապարտված են ձախողման:

Այս մասին, ինչպես հաղորդում է «Արմենպրես»-ը, ռուսաստանյան ՏՎՑ հեռուստաալիքի «Իմանալու իրավունք» ծրագրի եթերում հայտարարել է ՌԴ նախագահի մամուլի քարտուղար Դմիտրի Պեսկովը` պատասխանելով այն հարցին, թե ինչին են բերել Սու-24 ինքնաթիռի հետ միջադեպից հետո Մոսկվային եւ Անկարային հաշտեցնելու Ադրբեջանի փորձերը:

«Գիտեք, այդ փորձերն ավարտվել են ոչ մի բանով, եւ ընդհանրապես, տվյալ դեպքում միջնորդության որեւէ փորձեր, ամենից շուտ, հասկանալի պատճառներով դատապարտված են ձախողման», -ասել է Պեսկովը:

2015 թվականի նոյեմբերի 24-ին թուրքական օդուժը սիրիա-թուրքական սահմանում` Սիրիայի տարածքում խոցել էր ահաբեկիչների դեմ ռազմական գործողություններ իրականացնող ռուսաստանյան Սու-24 կործանիչին: Թուրքիայի հետ համագործակցող սիրիական ընդդիմադիր ջոկատներից մեկի թուրք հրամանատարը գնդակահարել էր կատապուլտից հետո օդապարիկով իջնող ռուս օդաչուին: ՌԴ նախագահ Վլադիմիր Պուտինը թուրքական կողմի քայլն անվանել էր «հարված թիկունքից», որից հետո Անկարայի եւ Մոսկվայի միջեւ հարաբերությունները կտրուկ վատացել են: Ռուսաստանը պատժամիջոցներ է մտցրել Թուրքիայի դեմ: ՌԴ-ն ամենաբարձ մակարդակով հայտարարել է, որ հարաբերությունների վերականգնման մասին կարելի է խոսել միայն միջադեպի հետ կապված Անկարայի պաշտոնապես ներողություն խնդրելուց հետո: Ադրբեջանն ավելի վաղ հայտարարել էր, որ ջանքեր է գործադրում Թուրքիայի եւ Ռուսաստանի միջեւ հարաբերությունները նորմալացնելու ուղղությամբ: