Ռուսական ֆուտբոլի լեգենդները Երևանում

Ռուսաստանն ու Հայաստանը խորացնում են համագործակցությունը սպորտի ոլորտում: 2026 թվականի փետրվարի 3-ից 6-ը «Ռոսսոտրուդնիչեստվա»-ի և Երևանի Ռուսական տան աջակցությամբ տեղի ունեցավ Ռուսաստանի ֆուտբոլային միության և Ռուսաստանի ֆուտբոլի Պրեմիեր լիգայի ներկայացուցիչների այցը Հայաստանի Հանրապետություն։

Այցի ծրագիրը նվիրված էր սպորտի ոլորտում հայ ռուսական համագործակցության զարգացմանը և ֆուտբոլի հանրահռչակմանը որպես հումանիտար երկխոսության արդյունավետ գործիք։ Ռուսական պատվիրակության կազմում ընդգրկված էին Ռուսաստանի ֆուտբոլային միության դեսպաններ և ռուսական ֆուտբոլի լեգենդներ Անդրեյ Տիխոնովը, Դմիտրի Ալենիչևը և Իգոր Սեմշովը, ինչպես նաև ՌՖՄ-ի և Պրեմիեր լիգայի ներկայացուցիչներ։ Այցի ընթացքում անցկացվեցին աշխատանքային հանդիպումներ Հայաստանի սպորտի ոլորտի պատասխանատուների հետ, այդ թվում Հայաստանի Հանրապետության ԿԳՄՍ նախարարության սպորտային քաղաքականության վարչության ղեկավարի, ինչպես նաև «Արարատ» ֆուտբոլային ակումբի ղեկավարության հետ։

Քննարկվեցին գործնական համագործակցության հեռանկարները, փորձի փոխանակման հնարավորությունները և համատեղ նախագծերի իրականացումը։ Առանձնահատուկ ուշադրություն դարձվեց երիտասարդության հետ աշխատանքին։ Այցի շրջանակում անցկացվեց ֆուտբոլային փառատոն, որի ընթացքում ռուս ֆուտբոլիստները վարպետության դասեր անցկացրին «Արարատ» ակումբի ակադեմիայի սաների համար։  

Ծրագրի կենտրոնական իրադարձությունը Երևանի Ռուսական տանը կազմակերպված բաց մամուլի ասուլիսն էր, որը նվիրված էր միջազգային սպորտային երկխոսության զարգացմանը։ Միջոցառման ընթացքում ներկայացվեց նաև խորհրդային ֆուտբոլի ամենանշանակալի գավաթներից մեկը՝ բյուրեղյա ԽՍՀՄ գավաթը, որը Երևան էր բերվել «Ոսկե դուբլ» ֆիլմի պրեմիերայի առիթով։

«Ռոսսոտրուդնիչեստվա»-ի ղեկավարի տեղակալ Իգոր Չայկան նշեց, որ Ռուսաստանի ֆուտբոլային միության և Պրեմիեր լիգայի ներկայացուցիչների այցը Հայաստան վառ օրինակ է, թե ինչպես կարող է սպորտը դառնալ ժողովրդական դիվանագիտության արդյունավետ գործիք։

 Նրա խոսքով՝ սպորտային համագործակցությունն ունի լուրջ ներուժ երկու երկրների միջև հումանիտար կապերի ամրապնդման համար, հատկապես երիտասարդության հետ աշխատանքի ուղղությամբ։ Նա ընդգծեց նաև, որ Նիկիտա Սիմոնյանի մասին ֆիլմի պրեմիերան այցին տվել է առանձնահատուկ խորհրդանշական նշանակություն։

Իգոր Չայկան հավելեց, որ ՌՖՄ-ի և Պրեմիեր լիգայի այցի կազմակերպմանը աջակցությունը համագործակցության սկզբունքորեն նոր ձևաչափ է, որը միավորում է կառույցների ջանքերը և հնարավորություն տալիս կառուցել համակարգված ու գործնական փոխգործակցություն օտարերկրյա սպորտային կազմակերպությունների հետ՝ բարձրացնելով համագործակցության որակական մակարդակը։

Նրա խոսքով՝ «Ռոսսոտրուդնիչեստվա»-ն մտադիր է ամրապնդել այս փորձը և ՌՖՄ-ի ու Պրեմիեր լիգայի հետ համատեղ շարունակել հետևողական աշխատանքը սպորտային և հումանիտար կապերի զարգացման ուղղությամբ՝ տարածելով դրական փորձը նաև այլ երկրների հետ փոխգործակցության վրա։ Ժամանակակից միջազգային պայմաններում սպորտը շարունակում է մնալ համընդհանուր լեզու, որը նպաստում է վստահության ձևավորմանը և բացում է լրացուցիչ հնարավորություններ երկրների միջև հումանիտար համագործակցության և կառուցողական երկխոսության զարգացման համար։

Ֆիլմի պրեմիերայից առաջ Երևանի Ռուսական տանը կազմակերպված բաց մամուլի ասուլիսի ժամանակ ռուսական ֆուտբոլի լեգենդները նշեցին, որ առաջին անգամ չեն Հայասանում և արդեն ծանոթ են մեր երկրի հյուրընկալությանը: Նշեցին, որ այստեղ ենք լեգենդար Նիկիտա Սիմոնյանին ևս մեկ անգամ մեծարելու, ներկա գտնվելու նրա մասին պատմող ֆիլմի պրեմիերային:

ֆուտբոլի Հայաստանի հավաքականի նախկին դարպասապահ, դարպասապահների նախկին մարզիչ Ռոման Անատոլիի Բերեզովսկին նշեց, որ այսօր՝ նայելով ֆուտբոլ խաղացող տղաներին,  կարծում է, որ  ֆուտբոլը շատ արագ է փոխվում:  

«Այդ պատճառով յուրաքանչյուր աշխարհի առաջնությունում դուք նայում եք որոշակի ցուցանիշների։ Այն արագանում է, դառնում է ավելի դինամիկ։ Եվ այդ պատճառով ես բախտ ունեցա խաղալ և անցնել այդքան շատ սերունդների միջով։ Ես սկսեցի, երբ դեռ կարող էիր գնդակը խլել պաշտպանից։ Հետո ամեն ինչ փոխվեց, կանոնները փոխվեցին։ Ահա թե ինչու է ֆուտբոլն արագանում, ավելի լարված դառնում»,- նշեց Բերեզովսկին:

Դմիտրի Ալենիչևը տեղեկացեց, որ այս աշնանը մտադիր են կազմակերպել «Սպարտակ» - «Արարատ» լեգենդների հանդիպում և այն նվիրել Նիկիտա Սիոմյանի հիշատակին:

«Շատ ցանկալի կլիներ հանդիպումն անցկացնել Երևանի Հրազդան ստադիոնում: Ցանկալի է, որ հայկական կողմը ըմբռնումով ընդունի մեր առաջարկը: Կցանկանայինք այդ հանդիպմանը մասնակցեին «Սպարտակ»-ի Երևանի «Արարատ»-ի լեգենդար ֆուտբոլիստները»:

Անդրեյ Տիխոնովը՝ խոսելով իր անձի ձևովորման մասին, ընդգծեց, որ ֆուտբոլիստների բնավորությունը ձևավորվում է դեռ մանկուց. «Այն մանկուց սերմանվում է և՛ ծնողների, և՛ փողոցի կողմից, քանի որ մենք մեծացել ենք փողոցներում։ Հեռավոր յոթանասունականների վերջերը, ութսունականների սկիզբը, դուք հիանալի հասկանում եք, որ բոլորն ապրում էին փողոցներում։ Փողոցում ավելի հարմար էր, քանի որ ոչինչ չկար, զվարճանքի միջոցառումներ չկային, հանգստի միջոցներ չկային: Այնպես որ, փողոցում մենք կարող էինք անել ամեն ինչ՝ սկսած սպորտից: Մեր սերունդը կարող էր անել ամեն ինչ: Հիմա երեխաներն են, ովքեր սահմանափակ են, նրանք նստած են իրենց հեռախոսների առջև, չեն կարող զբաղվել միայն մեկ սպորտաձևով, բայց, եթե նրանց դնեն չմուշկների վրա, կասեն. «Ի՞նչ է դա»։ Այսպիսով, բնավորությունը պետք է սերմանվի ծնողների կողմից։ Սկիզբը շատ կարևոր է ուժեղ անհատականություն ձևավոելու համար: Կարծում եմ՝ ես արդեն դպրոց ունեի, սա բանակն է, այն ժամանակ, երբ ԽՍՀՄ-ն դեռ գոյություն ուներ, երբ բանակում այդքան շատ տարբեր ազգություններ կային, մենք պայքարում էինք մի կտոր հացի համար։ Հիմա երիտասարդների համար սա հավանաբար նորություն է, բայց այն ժամանակ մենք պարզապես գոյատևում էինք։ Իմ կերպարը, հավանաբար, մանկուց, պատանեկությունից ձևավորվել է»,- նշեց Տիխոնովը: 

Ծրագրի ավարտին կայացավ «Ոսկե դուբլ» գեղարվեստական ֆիլմի պրեմիերան, որը նվիրված է խորհրդային անվանի ֆուտբոլիստ և մարզիչ Նիկիտա Սիմոնյանին, ով կարևոր դեր է խաղացել Երևանի «Արարատի» և խորհրդային ֆուտբոլի պատմության մեջ։

Պրեմիերան, կարմիր գորգն ու հայտնի հյուրերը՝ հաջորդ հրապարակման մեջ: