Մադագասկարը ազգային աղետի դրություն է հայտարարել՝ «Գեզանի» ցիկլոնի պատճառով

Մադագասկարի կառավարությունը ազգային աղետի ռեժիմ է հայտարարել՝ «Գեզանի» ցիկլոնի պատճառով, որի հետևանքով զոհվել է ավելի քան 30 մարդ։ Այս մասին հայտնել է տեղական Madagascar Tribune թերթը։

Ըստ հրապարակված տեղեկությունների՝ աղետի ռեժիմի հայտարարումը իշխանություններին թույլ է տալիս կայացնել առավել արդյունավետ որոշումներ և ապահովել ավելի լավ համակարգում։ Մասնավորապես, իշխանությունները կարող են քայլեր ձեռնարկել տեղաշարժը սահմանափակելու ուղղությամբ, փակել որոշակի շրջաններ, ինչպես նաև պարետային ժամ սահմանել։ Մադագասկարի օրենքների համաձայն՝ ազգային աղետի ռեժիմը կարող է գործել 15 օր՝ երկարաձգման հնարավորությամբ։

Ռիսկերի վերացման և աղետների դեմ պայքարի ազգային վարչության վերջին տվյալների համաձայն՝ կղզուն հարվածած ցիկլոնի հետևանքով զոհվել է 36 մարդ, տուժել՝ 374-ը, իսկ 6-ը համարվում են անհետ կորած։ Ընդհանուր առմամբ, ցիկլոնի հետևանքները ազդել են ավելի քան 257 հազար մարդու վրա, մոտ 9 հազար մարդ ստիպված է եղել լքել իր տունը։ Ամենաշատը տուժել է Տումասինա քաղաքը՝ երկրի երկրորդ մեծ քաղաքն ու գլխավոր նավահանգիստը, որը ավերվել է 80%-ով։ Երկրում ընդհանուր առմամբ ավերվել է մոտ 18 հազար բնակելի տուն, վնասվել՝ ևս 37 հազարը, ջրհեղեղի տակ է հայտնվել մոտ 12 հազարը։

«Գեզանի» ցիկլոնն արդեն լքել է Մադագասկարի տարածքը։ Ըստ Մադագասկարի օդերևութաբանական ծառայության տվյալների, այն ստացել է արևադարձային դեպրեսիայի կարգավիճակ։ Քամու արագությունը հասնում է 55 կմ/ժ-ի, իսկ առանձին պոռթկումները՝ մինչև 75 կմ/ժ-ի։