Ինչ նպատակով Ջորջ և Ամալ Քլունիները ապրիլին կժամանեն Հայաստան

Wnews.am-ը գրում է .

Հաստատվել է այն տեղեկությունը, որ  2016-ի ապրիլին հոլիվուդյան աստղ Ջորջ Քլունին և նրա կինը՝ փաստաբան Ամալ Քլունին կժամանեն Հայաստան: Այս մասին գրում է Hollywoodreporter-ը:

Հայտնի ընտանիքը  Երևանում կմասնակցի «Ավրորա»  մարդասիրական մրցանակաբաշխությանը, որը հայկական Սփյուռքի առաջնորդների` մոսկվաբնակ գործարար Ռուբեն Վարդանյանի, հոլիվուդյան աստղերի ու մարդու իրավունքների պաշտպանների համագործակցության արդյունքն է։ Այն շնորհվում է Հայոց ցեղասպանությունը վերապրածների անունից եւ ի երախտագիտություն նրանց, ովքեր փրկության ձեռք մեկնեցին հայ ժողովրդին: Մրցանակին արժանանալու է մերօրյա այն հերոսը, որն օգնում է մարդկանց՝ անձնվիրաբար եւ բացառիկ ջանքերով:

Ջորջ և Ամալ Քլունիները  Not On Our Watch ամերիկյան մարդասիրական կազմակերպության խորհրդի անդամներն են,  որը «Ավրորա»-ի հետ համատեղ իրականացնում է մարդասիրական  տարաբնույթ  միջոցառումներ:

Հայաստանյան այցի ժամանակ Ջորջ Քլունին  «Ավրորա» մարդասիրական համաշխարհային մրցանակը կհանձնի այն ֆինալիստին, ով անձնվիրաբար օգնում է մարդկանց։  Դափնեկիրը ստանալու է 100․000 ԱՄՆ դոլարի պարգեւ եւ նվիրատվության շղթան շարունակելու հնարավորություն՝ 1.000.000 ԱՄՆ դոլարի դրամաշնորհ ներկայացնելով իրեն ոգեշնչած մարդասիրական կազմակերպություններին։

Wnews.am– ը ներկայացնում է «Ավրորա» մրցանակի դափնեկրի 4 հավակնորդներին.

Հայր Բերնար Կինվի
Հայր Բերնար Կինվին հոգեւորական է դարձել 19 տարեկանում, երբ երկարատեւ բռնությունների ու հիվանդության հետեւանքով կորցրել է հորն ու չորս քույրերին։ Հեռանալով հայրենի Տոգոյի Լոմե քաղաքից՝ Հայր Կինվին տեղափոխվել է Կենտրոնաաֆրիկյան Հանրապետություն: Սահմանամերձ փոքրիկ Բոսսեմտելե քաղաքում նա գլխավորել է տեղի կաթոլիկ միսիան՝ դպրոցը, եկեղեցին եւ Հովհաննես Պողոս Բ  Պապի անունը կրող հիվանդանոցը։ Սակայն 2012 թվականին Կենտրոնաաֆրիկյան Հանրապետությունում մուսուլմանական Սելեկա դաշինքի ապստամբների եւ Հակաավտոմատավորների քրիստոնյա աշխարհազորի միջեւ (Anti-balaka) քաղաքացիական պատերազմ է բռնկվում։ Տեղի ունեցող բռնությունների ընթացքում Հայր Կինվիի միսիան ապաստարան ու բժշկական օգնություն է տրամադրել հակամարտության երկու կողմերից տուժածներին՝ հետապնդումից ու մահից փրկելով հարյուրավոր մարդկանց։

 Մարգարիտ Բարանկիցե
Մարգարիտ Բարանկիցեն աշխատում է Բուրունդիի Խաղաղության Տուն խնամքի տանը եւ REMA հիվանդանոցում: Բուրունդիի քաղաքացիական պատերազմի տարիներին հազարավոր կյանքեր է փրկել՝ խնամելով որբերին ու փախստականներին։ Ազգությամբ թութսի Բարանկիցեն պատերազմի սկզբում հետապնդումից փրկելու նպատակով փորձել է թաքցնել ազգությամբ հուլու 72 ամենամոտ հարեւաններին, սակայն երբ նրանց գտել են, բոլորին տեղում սպանել են՝ դրա բռնի ականտեսը դարձնելով նաեւ Բարանկիցեին։ Այս դաժան միջադեպից հետո Մարգարիտն իր կյանքը նվիրել է փախստականներին եւ երեխաներին խնամելու գործին։ Նա փրկել է ընդհանուր առմամբ 30,000 երեխայի եւ 2008 թվականին հիվանդանոց հիմնել, որտեղ մինչ օրս բժշկական օգնություն է ստացել 80,000 մարդ։

Սայիդա Ղուլամ Ֆաթիմա

Սայիդա Ղուլամ Ֆաթիման իր կյանքը նվիրել է պարտքի դիմաց ֆիզիկական շահագործման ենթարկվողներին փրկելուն՝ փորձելով վերացնել մերօրյա ստրկության վերջին ձեւերից մեկը։ Ֆաթիման Պակիստանի «Կախյալ շահագործվողների ազատագրության ճակատի» (BLLF) գլխավոր քարտուղարն է։ Կազմակերպության ջանքերով փրկվել են աղյուսի թրծման գործարաններում պարտքի դիմաց բռնությամբ աշխատող հազարավոր մարդիկ, այդ թվում՝ 21,000 երեխա։

Թոմ Քաթինա

Դոկտոր Թոմ Քաթինայից բացի Սուդանի Նուբա լեռների «Գթության Մայր» հիվանդանոցում ուրիշ բժիշկ չկա։ Ամերիկացի մասնագետը Հարավային Սուդանի հետ սահմանամերձ այս գոտում մշտական ներկայություն ունեցող միակ բժիշկն է, ուստիեւ անձամբ է պատասխանատու տարածաշրջանի 500,000 բնակչի բուժսպասարկման համար։ Չնայած Սուդանի կառավարության կողմից տարածքի բազմակի ռմբակոծումներին, դոկտոր Քաթինան մարդկանց օրուգիշեր հասանելի լինելու համար մշտապես ապրել է հիվանդանոցի տարածքում։ Նրա անձնվեր գործունեությունը լուսաբանվել է բազմաթիվ լրատվամիջոցների եւ մարդասիրական օգնություն տրամադրող կազմակերպությունների կողմից: Time Magazine-ը 2015թ. նրան ճանչել է ամենաազդեցիկ անհատներից մեկը։