«Հանգիստ, անհանգիստ»․ նոր ռեալիթի ճամփորդական նախագիծ՝ հակադրությունների մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Հանգիստ, անհանգիստ» նոր հեռուստանախագիծը փորձում է կոտրել ճամփորդության մասին ձևավորված իդեալական պատկերացումները և ցույց տալ մեդալի երկու կողմը՝ անհոգ շքեղությունն ու գոյատևման իրականությունը։ Հաղորդման պրոդյուսեր, հեղինակ Վահե Խաչատրյանի խոսքով՝ նախագիծը ոչ միայն ճամփորդական է, այլ նաև ռեալիթի ձևաչափով է կառուցված։

«Գաղափարը անցյալ տարի է ծնվել։ Ինքը առաջին հերթին ռեալիթի նախագիծ է, հետո նոր՝ ճամփորդական։ Մենք ժամանակին հաջողությամբ իրականացված կոնցեպտը մի փոքր բարձրացրել ու խորացրել ենք․ եթե այնտեղ մեկը քիչ գումար ուներ, մյուսը՝ շատ, ապա այստեղ մեկը ընդհանրապես գումար չունի, մյուսը՝ ունի։ Գումար չունեցողը ստիպված է գործ փնտրել, որպեսզի գոյատևի։ Այս կերպ ուզում ենք ցույց տալ, որ մարդիկ սովորաբար ճամփորդությունը պատկերացնում են որպես անհոգություն, բայց, երբ գնում ես այլ երկիր ու պետք է կենցաղդ ինքնուրույն հոգաս, այդ երկիրը բոլորովին այլ կերպ է բացվում քո առաջ»,- Tert.am Life-ի հետ զրույցում նշեց Վահե Խաչատրյանը։

Հաղորդման գաղափարախոսությունը, ինչպես ընդգծում է հեղինակը, հանգստի և անհանգստության հակադրության մեջ է․ շքեղության կողքին ներկայացվում է նաև դրա հակառակ կողմը։ Նախագիծը վարում են Վահե Խաչատրյանը և Հայարփի Զուռնաչյանը։

«Հայարփիի հետ աշխատել եմ մի քանի նախագծերում։ Նա բավական հետաքրքիր ու արագ կողմնորոշվող դերասանուհի է, որը նաև հաղորդավարական աշխատանքի մեջ է լավ դրսևորվում»,- ասաց Վահե Խաչատրյանը։

Հաղորդման ընթացքում նախատեսվում են նաև հյուրեր։ Արդեն նկարահանված թողարկումներից մեկում թիմին միացել է Լուիզա Ներսիսյանը, մյուսում՝ Վահեի եղբայրը՝ Վարդան Խաչատրյանը։ Առաջին նկարահանումները կայացել են Դուբայում՝ Արաբական Միացյալ Էմիրություններում։ «Դժվար էր նկարահանել, քանի որ հաճախ արգելվում են նկարահանումները։ Մեր ռեժիսորա-օպերատորական կազմի՝ Հրաչ Հարությունյանի և Սյուզիի հետ փորձում էինք լուծումներ գտնել, որպեսզի կարողանանք հետաքրքիր մատուցել նյութը»,- պատմեց նա։

Նախատեսվում է ներկայացնել շուրջ հինգ թողարկում Դուբայից, այնուհետև՝ նաև այլ երկրներից՝ Եվրոպայից և այլ ուղղություններից։ «Այսօր Դուբայը ամենափիառված ուղղություններից է, և հենց այդ տրամաբանության մեջ էլ կփորձենք ցույց տալ լաքշրիի հակառակ կողմը»,- եզրափակեց հաղորդման հեղինակը։ Հաղորդումը հեռարձակվում է Շանթ հեռուստատեսությամբ և տեղադրվում է նաև Վահե Խաչատրյանի YouTube-յան ալիքում։

«Հանգիստ, անհանգիստ» հաղորդման նոր ռեալիթի ձևաչափը մասնակցին ու հեռուստադիտողին փորձում է մտցնել ամենավառ իրավիճակների մեջ, որտեղ ամեն ինչ իրական է ու անսպասելի։ Հաղորդավարուհի Հայարփի Զուռնաչյանը խոստովանում է, որ հենց այս իրականությունն է նրան առավել հետաքրքրել նախագծում։ «Ինձ համար շատ հետաքրքիր ֆորմատ է։ Ռեալիթի է, շատ իրավիճակներ լինում են, որ պետք է տեղում կողմնորոշվես՝ ինչ անել, ոնց անել, դա հետաքրքրացնում է գործընթացը։ Սարքած չէ, ամեն ինչ շատ իրական է եղել։ Ով կհաղթի՝ ես, թե Վահեն, միշտ լարվածություն կար, բայց ինչ խոսք՝ ամեն ինչ արդար է եղել։ Ինձ համար ամենահետաքրքիրը ոչ միայն հաղթելն է, այլև այն, թե պարտվելու դեպքում ինչպես գոյատևել, երկու դեպքում էլ ստեղծվում են շատ հետաքրքիր իրավիճակներ»,- պատմեց նա։

Հայարփին ընդգծեց նաև, որ առաջարկը ընդունելիս երկար չի մտածել. «Ես շատ սիրով ընդունել եմ առաջարկը, որովհետև շատ սիրում եմ նման նախագծեր։ Ուզում էի, որ դիտողը տեսնի իրականությունը, ոչ թե կեղծ իրավիճակներ։ Այն, ինչ զգում ես հենց այդ պահին, դա պետք է փոխանցես, և հուսով եմ՝ հաջողվել է։ Շատ շնորհակալ եմ օպերատորներին, ովքեր օգնել են, որ ամեն պահը գցված լինի տեսախցիկի շրջանակի մեջ և անսպասելիության ամբողջ մթնոլորտը պահպանվի»,- ավելացրեց Հայարփի Զուռնաչյանը։

Հետևեք մեզ՝ այստեղ