Սպանության մեջ մեղադրվողներն անչափահասներ են

Սևան քաղաքում փետրվարի 21-ին տեղի ունեցած սպանությունից ցնցված են թե՛ սևանցիները, թե՛  ողջ հանրությունը: Դանակահարման հետեւանքով սպանված 19-ամյա Արամ Խաչատրյանը, ով Տավուշի մարզի Վերին Ծաղկավան համայնքից էր, ՊՆ պայմանագրային զինծառայող էր, «Պաշտպան հայրենյաց» ծրագրի մասնակից։ Նա սպանությունից երկու օր առաջ էր իջել հերթափոխից։ Այսօր Վերին Ծաղկավանում Արամ Խաչատրյանի հուղարկավորությունն է։ Գյուղի բնակիչները կատարվածից շոկի մեջ են, ամբողջ գյուղը սգում է երիտասարդի ողբերգական մահը։  

Սևանում լուրեր են շրջանառվում, որ 19-ամյա Արամ Խաչատրյանին դանակահարել է Սևանում բնակվող 16-ամյա Ն. Մելքոնյանը, նրա հետ է եղել նաեւ ընկերը՝ 14 տարեկան, որն էլ բնակվում է Սևանի հանրակացարանում: Սևանցիները մեզ պատմեցին, որ նրանք բնիկ սեւանցիներ չեն։ Ընտանիքը մի քանի տարի առաջ է տեղափոխվել Սեւան, եւ բնակվում են Գարաժ կոչվող թաղամասում։ Ենթադրաբար սպանություն գործած տղան սովորել է Սեւանի թիվ 4 հիմնական դպրոցում։ Հայրը  դատված է եղել` նոր է հայտնվել ազատության մեջ։ Իսկ սպանությունը, ըստ լուրերի, եղել է աղջկա պատճառով: Արամ Խաչատրյանին զանգահարել, կանչել են Սևան, նա եկել է հանդիպման, հենց այդտեղ էլ մահացու դանակի հարվածներ է ստացել։ Երկու անչափահասներն այս պահին ձերբակալված են: ՀՀ քրեական օրենսգրքի 155-րդ հոդվածի 1-ին մասի հատկանիշներով նախաձեռնվել է քրեական վարույթ։ Որպես խափանման միջոց ընտրվել է կալանավորումը՝ 1 ամիս ժամկետով: