Դպրոցի տնօրենն ասում է՝ պատահական է ձեռքը տարել այդ ուղղությամբ, մյուսն էլ՝ գլուխը. Ինչ է 14 ամյա երեխան դպրոցում իրականում ստացել քթի կոտրվածքը

Դպրոցում հերթական միջադեպն է արձանագրվել երեխաների մասնակցությամբ, որի ժամանակ 14-ամյա տղան քթի կոտրվածք է ստացել, որի իրական հանգամանքները, կարծես թե, փորձ է արվում խեղաթյուրել։

Ահազանգն ստացվել է փետրվարի 23-ին՝  Գեղարքունիք մարզում։ ՀՀ ՆԳՆ ոստիկանության համայնքային ոստիկանության գլխավոր վարչության Գավառի բաժնում ստացված օպերատիվ տեղեկությունների համաձայն՝ Ծովազարդ բնակավայրի միջնակարգ դպրոցում դասամիջոցի ընթացքում 14-ամյա Ա. Խ.-ն հարվածել է իր համադասարանցի 14-ամյա Հ. Դ.-ի դեմքին՝ պատճառելով մարմնական վնասվածք։ Այսինքն՝ իրավապահներն ունեն կոնկրետ ահազանգ, իսկ դպրոցի տնօրենն ասում է՝ ոչ մի վեճ չի եղել։

«Երեխան պատահական է ձեռքը տարել այդ ուղղությամբ, մյուսն էլ գլուխն է թեքել այդ կողմ»,– կոտրվածքն այսպես է  «Փաստինֆո»-ին պատճառաբանել  Ծովազարդի միջնակարգ դպրոցի տնօրեն Նվեր Գալստյանը՝ պնդելով. «Երեխաների մեջ վեճ չի եղել։ Ոչ դիտավորություն է, ոչ կռիվ է։ Դեպքը տեղի է ունեցել առաջին դասից հետո՝ դասամիջոցին, իրենց դասարանի ներսում։

Իսկ վարչական ղեկավար  Արամայիս Ենգոյանն էլ «Փաստինֆո»-ին ասել է, թե «Դասամիջոցի ժամանակ կատակ անելուց ձեռքով խփել է»։

Վարչական ղեկավարի փոխանցմամբ՝ տուժածը դիմել է բժշկի,  եւ միայն  այտուցվածության անցնելուլ հետո պարզ կլինի՝ վիրահատության կարիք կա՞, թե՞ ոչ։  
Թերեւս դատաբժշկական փորձաքննությամբ կպարզվի, թե արդյոք ուղղակի գլխուխը թեքելու եւ ձեռքը միամիտ կպնելու հետեւանքով հնարավոր է, որ երեխան կոտրվածք ստանար։ Եթե ոչ, ապա թերեւս առնվազն ԿԳՄՍ-ն պետք է հետեւություններ անի, թե ինչ կադրերի է վստահում երեխաների կրթությունը, որոնք պատրաստ են ստել, կեղծ տեղեկություններ տրամադրել՝ թերեւս իրենց անգործությունը քողարկելու համար։ Ի վերջո, դպրոցում երեխաները գտնվում են մանկավարժների, դպրոցների ղեկավարության հոգածության ներքո ու հենց նրանք են պարտավոր հետեւել բարոյահոգեբանական մթնոլորտին։