300 հազար աշխատատեղից մինչև 20 հազար մատչելի բնակարան

Հայաստանի շինարարության ոլորտը վերջին տարիներին զարգացել է հիմնականում մայրաքաղաքում և սահմանափակ հատվածներում, մինչդեռ մարզերում բնակարանաշինությունը շարունակում է մնալ ցածր ակտիվության մակարդակում։ Այս ֆոնին «Ուժեղ Հայաստան» կուսակցության առաջնորդ Սամվել Կարապետյանի ներկայացրած 20 հազար մատչելի բնակարան կառուցելու ծրագիրը դիտարկվում է ոչ միայն որպես սոցիալական, այլև լայն տնտեսական նախաձեռնություն։

Ծրագրի առանցքային դրույթներից մեկն այն է, որ հողհատկացման դիմաց կառուցված բնակարանների մի մասը կփոխանցվի պետությանը։ Դրանք հետագայում կվաճառվեն քաղաքացիներին արտոնյալ պայմաններով կամ ֆիքսված գնով։ Այս մոտեցումը, ըստ ծրագրի հեղինակների, հնարավորություն է տալիս միաժամանակ լուծել մի քանի խնդիր՝ խթանել շինարարությունը, մեծացնել զբաղվածությունը և ապահովել բնակարանային հասանելիություն միջին և ցածր եկամուտ ունեցող ընտանիքների համար։

Շինարարության ոլորտը տնտեսության այն ճյուղերից է, որն ունի բազմապատկող ազդեցություն։ Յուրաքանչյուր նոր կառուցապատում ներգրավում է շինանյութի արտադրություն, փոխադրումներ, նախագծում, ճարտարապետություն, ֆինանսական ծառայություններ։ Եթե ծրագիրը իրականացվի ամբողջ ծավալով, այն կարող է դառնալ տնտեսական ակտիվության խթան հատկապես մարզերում՝ նպաստելով նաև 300 հազար նոր աշխատատեղ ստեղծելու ավելի լայն նպատակի իրագործմանը։

Սամվել Կարապետյանի ներկայացրած տնտեսական հինգ կետերը ներառում են 300 հազար նոր աշխատատեղերի ստեղծում, մասնավորապես մարզերում, փոքր բիզնեսի համար զրոյական հարկային դրույքաչափ, դեղորայքի գների 20 տոկոսով նվազեցում, գյուղացիների համար բերքի երաշխավորված մթերում և 20 հազար մատչելի բնակարանի կառուցում պետական աջակցությամբ։ Ծրագրի տրամաբանությունն այն է, որ սոցիալական և տնտեսական խնդիրները պետք է լուծվեն համակցված քաղաքականությամբ՝ աշխատատեղ, եկամուտ, հասանելի ծառայություններ և բնակարան։

Տնտեսագետների դիտարկմամբ՝ մատչելի բնակարանաշինության ծրագիրը կարող է նաև կարգավորիչ դեր ունենալ շուկայի համար՝ զսպելով գների կտրուկ աճը և ձևավորելով ավելի կանխատեսելի միջավայր։ Միաժամանակ կարևոր է ծրագրի ֆինանսավորման և վերահսկողության մեխանիզմների հստակեցումը, որպեսզի նախաձեռնությունը դառնա ոչ թե կարճաժամկետ ազդեցություն ունեցող քայլ, այլ երկարաժամկետ ռազմավարություն։

«Ուժեղ Հայաստան» կուսակցությունն իր տնտեսական օրակարգը ներկայացնում է որպես համակարգային փոփոխությունների փաթեթ։ Սամվել Կարապետյանի ղեկավարած քաղաքական ուժը շեշտադրում է, որ տնտեսական վերափոխումն է երկրի զարգացման հիմնական նախապայմանը, և առաջարկվող քայլերը հիմնված են գործարար փորձի վրա։

Թե որքանով այս նախաձեռնությունները կկարողանան վերածվել գործնական արդյունքի, կախված կլինի քաղաքական գործընթացների զարգացումից և ծրագրերի իրագործման հնարավորություններից։ Սակայն արդեն այժմ ակնհայտ է, որ տնտեսական օրակարգի շուրջ ձևավորվում է քննարկում, որտեղ 300 հազար աշխատատեղից մինչև 20 հազար մատչելի բնակարան ծրագիրը ներկայացվում է որպես համապարփակ զարգացման մոդել։