Կթույլատրե՞ն իրական մրցակցություն․ Նարեկ Կարապետյանը վստահ է՝ հիմնական ընդդիմությանը չեն կարող արգելել մասնակցել ընտրություններին

Հայաստանի քաղաքական դաշտում նախընտրական լարվածությունը գնալով աճում է։ Գործող իշխանությունը պատրաստվում է իր ղեկավարի հետ գնալ իշխանության երրորդ ժամկետի, ինչը շատերի գնահատմամբ ժողովրդավարական համակարգի համար բացասական նախադեպ է։ Այս պայմաններում ավելի հաճախ են հնչում մտահոգություններ՝ արդյոք Հայաստանում հնարավոր է այսպես կոչված «մոլդովական սցենարը», երբ իշխանությունը սահմանափակում է հիմնական ընդդիմադիր ուժերի մասնակցությունը ընտրություններին։ Սակայն «Ուժեղ Հայաստան» կուսակցության ներկայացուցիչ Նարեկ Կարապետյանը համոզված է, որ իշխանությունը չի գնա նման քայլի։

Մարտի 6-ին լրագրողների հետ հանդիպման ընթացքում նա անդրադարձել է այն քննարկումներին, թե հնարավոր է «Ուժեղ Հայաստան» կուսակցությանը թույլ չտան մասնակցել առաջիկա խորհրդարանական ընտրություններին։ Նրա խոսքով՝ նման որոշումը ոչ միայն հակասելու է ժողովրդավարական սկզբունքներին, այլև լուրջ հետևանքներ կունենա երկրի քաղաքական համակարգի համար։

«Կարող են ընդհանրապես ժողովրդավարությունը չեղյալ հայտարարել, հավաքվել փոքր խմբով ու որոշել, թե ով է լինելու վարչապետը կամ քանի անգամ կարող է նույն մարդը զբաղեցնել այդ պաշտոնը։ Բայց կա նաև ժողովրդավարություն և մարդկանց կարծիք։ Թող մարդիկ որոշեն։ Դա որևէ մեկի թույլ տալու կամ չթույլատրելու հարց չէ, դա մեր սահմանադրությամբ է ամրագրված»,– նշել է Կարապետյանը։

Նրա գնահատմամբ՝ Հայաստանի պատմության ընթացքում երբեք չի եղել իրավիճակ, երբ հիմնական ընդդիմադիր ուժին արգելվել է մասնակցել ընտրություններին։ Եթե իշխանությունը գնա այդ քայլին, ապա դա կարող է փակել երկրի զարգացման բազմաթիվ հնարավորություններ և Հայաստանին կրկին վերադարձնել փակ քաղաքական շրջափուլի մեջ։

Կարապետյանի համոզմամբ՝ հասարակության մեջ ձևավորվել է փոփոխության ակնկալիք, և հենց այդ պահանջն է ձևավորում նոր քաղաքական նախաձեռնությունների անհրաժեշտությունը։

«Մենք առաջարկում ենք ծրագրեր երկրի փոփոխության համար, ոչ թե պարզապես մարդկանց դեմքերի փոփոխություն։ Եթե իշխանությունը իրականացրած լիներ այն փոփոխությունները, որոնց մասին խոսել է, մեր կարիքը չէր լինի։ Բայց այսօր հասարակությունը զգում է նոր առաջնորդության պահանջը։ Մենք կներկայացնենք մեր առաջարկները, իսկ ժողովուրդը թող ինքն ընտրի։ Ոչ ոք իրավունք չունի ժողովրդի փոխարեն որոշումներ կայացնելու»,– ասել է նա։

Կարապետյանը նաև արձագանքել է «Հանրապետություն» կուսակցության ղեկավար Արամ Սարգսյանի հայտարարությանը, ըստ որի «Ուժեղ Հայաստան» կուսակցությանը չպետք է թույլ տալ մասնակցել ընտրություններին՝ այն որակելով որպես արտաքին ազդեցության ուժ։ Կարապետյանը նշել է, որ նման որոշումներ որևէ քաղաքական գործիչ չի կարող կայացնել։

«Ես չեմ կարծում, որ Հայաստանում որևէ մեկի ձեռքում է որոշել, թե ով կարող է մասնակցել ընտրություններին, իսկ ով՝ ոչ։ Ամենայն հարգանքով նրա ընտանիքի հանդեպ՝ կարծում եմ, նման որոշումները որևէ առանձին քաղաքական գործչի կողմից չեն ընդունվում»,– ասել է նա։

Նարեկ Կարապետյանը անդրադարձել է նաև միջազգային հարցումների արդյունքներին։ Նա հիշեցրել է ամերիկյան հետազոտական կազմակերպության հրապարակած տվյալները, ըստ որոնց գործող իշխանության վարկանիշը կազմում է շուրջ 24 տոկոս, «Ուժեղ Հայաստան» կուսակցության աջակցությունը՝ մոտ 9 տոկոս, իսկ մյուս ընդդիմադիր ուժերի աջակցությունը՝ ավելի ցածր։

Կարապետյանի կարծիքով՝ անգամ այդ տվյալները ցույց են տալիս հասարակության մեջ առկա հիասթափության մակարդակը։

«Անգամ իրենց ներկայացրած հարցումները ցույց են տալիս, թե որքան մեծ է դժգոհությունը իշխանության նկատմամբ։ Խոստումներ շատ են եղել, գեղեցիկ խոսքեր նույնպես, բայց իրական քայլեր և արդյունքներ մարդիկ չեն տեսել»,– նշել է նա։

Նրա խոսքով՝ այդ հարցումն իրականացվել է դեռ այն ժամանակ, երբ «Ուժեղ Հայաստան» կուսակցության հիմնադիր համագումարում չէր հայտարարվել, որ վարչապետի թեկնածու է առաջադրվելու Սամվել Կարապետյանը։ Բացի այդ, ըստ Կարապետյանի, հարցումների արդյունքների վրա մեծ ազդեցություն ունի այն, թե ինչպիսի ընտրանքային խումբ է օգտագործվում հարցման ընթացքում։

«Հարցումների ամենակարևոր մասը բազան է։ Եթե ընտրում ես այնպիսի բազա, որտեղ մեծ մասը իշխանության կողմնակիցներ են, բնականաբար արդյունքն էլ ավելի իշխանամետ կլինի։ Դա ամբողջ գիտություն է։ Սակայն նույնիսկ այդ պայմաններում նրանք ունեն ընդամենը մոտ 24-25 տոկոս աջակցություն։ Այն ժամանակները, երբ խոսվում էր 40 կամ 50 տոկոս վարկանիշի մասին, արդեն անցել են»,– ասել է Կարապետյանը։

Նրա գնահատմամբ՝ իշխանությունը հասկանում է հասարակության մեջ ձևավորված դժգոհությունը և փորձում է նոր օրակարգեր առաջ բերել՝ քաղաքական գործընթացների վրա ազդեցություն ունենալու համար։

Միևնույն ժամանակ քաղաքական դաշտում ակտիվ քննարկվում է նաև այն հարցը, թե արդյոք կարող է կրկնվել այն սցենարը, որը տեղի ունեցավ Գյումրիում։ Հիշեցնենք, որ քաղաքում անցկացված ընտրությունները կազմակերպել էր հենց գործող իշխանությունը, սակայն ընտրողները իրենց ձայները տվեցին ընդդիմությանը՝ մերժելով իշխող ուժին։

Այս ֆոնին «Ուժեղ Հայաստան» կուսակցության գործունեությունը վերջին ամիսներին ակտիվացել է հանրապետության տարբեր մարզերում և համայնքներում։ Քաղաքական դիտորդների գնահատմամբ՝ կուսակցությունը արագորեն դարձել է ընդդիմադիր դաշտի ամենաքննարկվող ուժերից մեկը՝ փորձելով ձևավորել նոր օրակարգ և ներկայացնել զարգացման սեփական ծրագիրը երկրի համար։