Արտահերթ թողարկում. Վերջին նորությունները շփման գծից

News.am-ը գրում է .

Ստեփանակերտը հրապարակել է վերջին տվյալները շփման գծի մի քանի օրվա ռազմական գործողություններից: Հայկական կողմն ունի 20 զոհ, 26 անհետ կորած, 72 վիրավոր:

Խաղաղ բնակչության շրջանում զոհերից մեկը երեխա է, երեքը՝ չափահաս: Մարտերի ընթացքում ադրբեջանական կողմը տվել է 300-ից ավելի զոհ:

«Հայկական որեւէ բնակավայր չի գտնվում ադրբեջանական վերահսկողության տակ: Ունեցել ենք 8 դիրքի կորուստ: Այն հատվածներում, որտեղ թշնամին կարողացել է մխրճվել, խորությունը կազմում է 200-300 մետր, եւ այնտեղ բնակավայր չկա: Սա նշանակում է, որ հայկական որեւէ բնակավայր չի գտնվում թշնամու վերահսկողության տակ»,- նշել է գնդապետը:

Ապրիլի 4-ին հակառակորդը նոր զինատեսակներ է օգտագործել, առաջին անգամ գործածել է ռուսական ՏՕՍ-1 հրանետ, սակայն վրիպել է՝ նպատակին չհասնելով, փորձել է նաեւ կիրառել ինքնակործանվող անօդաչու սարք, որը մեր հակաօդայինները ոչնչացրել են:

Հայկական կողմն ունի յոթ տանկի կորուստ: Ադրբեջանցիները կորցրել են 18 տանկ, երկու ուղղաթիռ, մեկ ինժեներական տեխնիկա, 3 հետեւակի մարտական մեքենա, 6 անօդաչու թռչող սարք, 1 «Գրադ» կայան:

Արցախն այսօր վերջին հրաժեշտն է տվել 12-ամյա Վաղինակ Գրիգորյանին, նա ադրբեջանական ագրեսիայի առաջին զոհերից էր, մահացել էր ապրիլի 2-ի առավոտյան Մարտունու շրջանի Հերհեր գյուղի դպրոցում, «Գրադ» կայանքից հրթիռահրետակոծության հետեւանքով:

Այսօր Մարտակերտի շրջանում հակառակորդը ռմբակոծել է սիսիանցի կամավորներին տեղափոխող մարդատար ավտոբուսը: Զոհվել է հինգ մարդ, որոնցից 1-ը գյուղապետ է: Դեպքի մանրամասները ճշտվում են:

Այսօր հայտնի են դարձել որոշ մանրամասներ ադրբեջանցիների հարձակման ժամանակ զոհված, 26-ամյա կապիտան Արմենակ Ուրֆանյանի հերոսական պայքարի մասին: 4-րդ հրաձգային վաշտի հրամանատարն իր անձնակազմի հետ երկար մարտի է բռնվել հակառակորդի հետ, որի գերազանցող ուժերի ճնշման տակ անձնակազմին հետ ուղարկելով միայնակ շարունակել է մարտը, խոցելով մեկ տանկ և մոտ մեկ տասնյակ թշնամու զինվոր: Վերջում մի քանի նռնակներ նետելով՝ չի թողել իրեն շրջապատեն ու վերջին նռնակով իր հետ միասին պայթեցրել է մոտեցողներին։

Հանրապետության նախագահ Սերժ Սարգսյանը զինվորական հոսպիտալում ացելել է մարտական գործողությունների հետեւանքով վիրավորված զինծառայողներին: Սերժ Սարգսյանը բժիշկներից հետաքրքրվել է վիրավորների առողջական վիճակով, զորակցություն հայտնել զինծառայողներին, մաղթել նրանց շուտափույթ ապաքինում:

Դրանից առաջ Սերժ Սարգսյանն ընդունել է Հայաստանում ԵԱՀԿ երկրների դեսպաններին եւ հայտարարել, որ Ադրբեջանն է նախահարձակ եղել, Հայաստանը եւ Լեռնային Ղարաբաղը կողմ են, որպեսզի դադարեցվեն ռազմական գործողությունները, խստորեն պահպանվի 1994թ. զինադադարի ռեժիմը եւ որ բոլոր զորամիավորումները վերադառնան մինչեւ 2016թ. ապրիլի 1-ի իրենց զբաղեցրած դիրքերն ու զորանոցները: Նախագահի խոսքով՝ Թուրքիան հանդես է գալիս տարածաշրջանում մեծ պատերազմ հրահրելու դիրքերից եւ բացահայտ քաջալերում ադրբեջանական ղեկավարության արկածախնդիր քաղաքականությունը:

Սերժ Սարգսյանը հայտարարել է՝ եթե ռազմական գործողությունները շարունակվեն և ստանան լայնածավալ մասշտաբ, Հայաստանի Հանրապետությունը ճանաչելու է Լեռնային Ղարաբաղի անկախությունը: