«Թատրոնի միջոցով հայ երեխաները ԱՄՆ-ում չեն մոռանա լեզուն». Լոս Անջելեսում գործող «Glendale theatre group» տիկնիկային թատրոնը ներկայացնում է հայկական մշակույթը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Լոս Անջելեսի հայկական՝ «Glendale theatre group» տիկնիկային թատրոնը նպատակ ունի փոքրիկներին ներկայացնել հայկական մշակույթը հետաքրքիր ու հոգեհարազատ ձևով: Թատրոնում երեխաները կարող են լսել ոչ միայն հայերեն, այլև տեսնել իրականացված հայկական հեքիաթներ, կենդանի շփում ունենալ դերասանների հետ:

Թատրոնի հիմնադիր Գրիգորի Հակոբյանն, ով արդեն 10 տարի ապրում է ԱՄՆ-ում, Tert.am Life-ի հետ զրույցում պատմեց, որ թատրոնն ունի 5-ից ավելի ներկայացումներ, հանդես է գալիս խաղացանկով:

«Թատրոնում զբաղված են Երևանում հայտնի և վաստակավոր դերասաններ՝ Վարուժան Մանուկյանը, Նարինե Ալեքսանյանը, Արմեն Մարգարյանը, Դուստրիկ Խաչատրյանը, Լուսինե Ուրֆալյանը և այլք: Բոլորը պրոֆեսիոնալ մարդիկ են, իրենց գործի հմուտ գիտակ և իրենց աշխատանքը կատարում են մեծ սիրով ու հոգատարությամբ: Նկարչական ձևավորումը կատարում  է Նարեկ Քեշիշյանը: Տիկնիկները պատրաստվում են Երևանում հայտնի տիկնիկագործ և դերասան Աղասի Մելքոնյանի կողմից:

Տիկնիկային արվեստը զարգացնում է մանկական երևակայությունը և թույլ է տալիս երեխաներին արտահայտել ինքնուրույն միտք, մտերմանալ հեքիաթների միջոցով»,- նշեց դերասանը:

Գրիգորիի խոսքով՝ իր հիմնած թատրոնի միջոցով հայ երեխաները չեն կորցնի լեզուն, հիշողությունները և արժեքները, մինչդեռ մեծանում են ամերիկյան բազմազան մշակութային միջավայրում: «Այս միջավայրը հանդիսանում է ոչ միայն ուսուցման հրապարակ, այլև տուն, որտեղ յուրաքանչյուր փոքրիկ հայ կարող է զգալ, որ իր արմատները ամուր են և մշակութային ժառանգությունը կենդանի է: Ծնողները հնարավորություն ունեն հետևել խաղացանկին, ամեն ամիս իրենց երեխաներին տանել տիկնիկային թատրոն ու հետ չպահել տիկնիկային արվեստից»,- մեզ հետ զրույցում ասաց դերասանը: 

Մայիս 31-ին «Glendale theatr group» տիկնիկային թատրոնում տեղի կունենա պրեմիերա՝ Կարո Կիրակոսյանի «Հրաշագործ մանչուկը»:

Հեղինակ՝ Անի Մնացականյան

Հետևեք մեզ՝ այստեղ