ԱԱ-2026. ևս երկու հավաքական պայքարը կշարունակի միջմայրցամաքային փլեյ-օֆֆի եզրափակչում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Աշխարհի 2026 թվականի առաջնության միջմայրցամաքային որակավորման փլեյ-օֆֆի կիսաեզրափակչում կայացան ևս երկու հանդիպումներ. Բոլիվիայի և Յամայկայի ազգային հավաքականները հաղթանակներ տարան՝ դուրս գալով եզրափակիչ, որտեղ կվիճարկեն Մունդիալի ուղեգրերը։

Բոլիվիայի ընտրանին լարված պայքարում 2-1 հաշվով առավելության հասավ Սուրինամի նկատմամբ։ Հաղթողների կազմում աչքի ընկան Մոյսես Պանիագուան և Միգել Տերսերոսը, իսկ Սուրինամի միակ գնդակը հեղինակեց Լիամ վան Գելդերենը։ Փլեյ-օֆֆի եզրափակչում Բոլիվիան կմրցի Իրաքի հավաքականի հետ։ Այդ հանդիպումը կկայանա ապրիլի 1-ին։

​Մյուս կիսաեզրափակչում Յամայկայի հավաքականը Մեքսիկայում կայացած խաղում նվազագույն՝ 1-0 հաշվով պարտության մատնեց Նոր Կալեդոնիային։ Հանդիպման միակ և հաղթական գոլը խփեց Բեյլի Կադամարտերին։ Որակավորման վճռորոշ փուլում Յամայկայի մրցակիցը կլինի Կոնգոյի Դեմոկրատական Հանրապետության (ԿԴՀ) հավաքականը։ Խաղը կկայանա մարտի 31-ին կրկին Մեքսիկայում, իսկ հաղթողը կնվաճի աշխարհի առաջնության ուղեգիր։

​Հիշեցնենք, որ աշխարհի առաջնությունը կմեկնարկի հունիսի 11-ին և կավարտվի հուլիսի 19-ին։ Մրցաշարին պատմության մեջ առաջին անգամ կմասնակցի 48 հավաքական։ Խաղերը կընդունեն երեք երկրներ՝ ԱՄՆ-ն, Կանադան և Մեքսիկան։

Գործող չեմպիոնն Արգենտինայի հավաքականն է, որը 2022-ի դրամատիկ եզրափակչում հետխաղյա 11-մետրանոցներով հաղթել էր Ֆրանսիային (3-3, 4-2):

Հետևեք մեզ՝ այստեղ