Գիտնականները փրկարարական գործողության ավարտից հետո կորցրել են կապը Թիմի անունով սապատավոր կետի հետ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին                     

Սապատավոր կետը, որը մի քանի շաբաթ ծանծաղուտում էր անցկացրել Բալթիկ ծովի ափերի մոտ, վերջապես բաց է թողնվել բաց ծով, հայտնել է DW-ն։

Շաբաթ օրը՝ մայիսի 2-ի առավոտյան, Թիմի անունն ստացած կետը փրկարարների բեռնանավից հեռացել է դանիական Սկագենից մոտ 70 կիլոմետր հեռավորության վրա։

GPS-հաղորդչի տվյալները, որոնք պետք է ցույց տային, թե կետը որ ուղղությամբ է շարժվել, այդպես էլ չեն ստացվել՝ ոչ առավոտյան, ոչ էլ կեսօրին։ Մեկլենբուրգ–Առաջավոր Պոմերանիա երկրամասի իշխանությունները հայտնել են, որ բազմիցս պահանջել են այդ տվյալները, սակայն ապարդյուն։

Տարածաշրջանի շրջակա միջավայրի նախարար Թիլ Բաքհաուսը հայտնել է, որ տվյալների փոխանցման անհրաժեշտությունը նախապես համաձայնեցված էր, որպեսզի հնարավոր լիներ հետևել կետին։ Ավելին, բեռնանավի վրա պետք է տեղադրված լիներ տեսահամակարգ, որպեսզի անասնաբույժները կարողանային հետևել Թիմիին․ ըստ ամենայնի, նշել է Բաքհաուսը, ոչ մեկը, ոչ էլ մյուսը չի արվել։

Տվյալների հետ կապված անորոշությունը կտրուկ արձագանք է առաջացրել նաև գիտնականների շրջանում, որոնք այս ամբողջ ընթացքում հետևում էին Թիմիին։ Ծովային կենսաբան և կետերի հետազոտող Ֆաբիան Ռիթերը հայտնել է․ եթե հաստատվի, որ տվյալների հաղորդիչը չի աշխատում, դա «աղետ» կլինի։ Առանց տվյալների անհնար է հասկանալ՝ կետը ողջ է մնացել, ինչպես է իրեն պահում, և ընդհանրապես իմաստ ուներ արդյոք ողջ գործողությունը։

Միևնույն ժամանակ, առայժմ չի հաջողվել հաստատել անգամ հաղորդչի տեղադրման փաստը, որի մասին ավելի վաղ հայտնել էին փրկության մասնավոր նախաձեռնության ներկայացուցիչները․ դրա վրա, ինչպես իրենք են նշել, գերմանացի գործարարներ Կարին Վալտեր-Մոմերտն ու Վալտեր Գունցը ծախսել են մոտ 1,5 մլն եվրո։

Ազատվելուց հետո ճշգրիտ տեղեկություն չի ներկայացվել այն մասին, թե կոնկրետ ինչպես է կետը լքել բեռնանավակը՝ ինքնուրո՞ւյն, թե՞ մարդկանց օգնությամբ։ Der Spiegel-ի պնդմամբ՝ Թիմին լքել է նավակը ավելի վաղ, քան մասնագետները հասցրել էին իրականացնել ևս մեկ նախատեսված զննում։

Տեղափոխման ընթացքում, հատկապես Բալթիկ ծովից դեպի Հյուսիսային ծով անցման շրջանում, ուժեղ փոթորիկ էր, և կետը ենթարկվել է ուժեղ տարուբերումների։

Հայտնի է, որ կենդանին մոտ երկու ամիս անցկացրել է ափամերձ ծանծաղ ջրերում՝ հաճախ անշարժ պառկած։ Սա լուրջ մտահոգություններ է առաջացնում․ մասնագետները կասկածում են՝ արդյոք այժմ նա ի վիճակի է նորմալ սուզվել, լողալ և սնունդ հայթայթել։ 

Սապատավոր կետի երիտասարդ արուն՝ մոտավորապես 4-6 տարեկան, առաջին անգամ Բալթիկ ծովում նկատվել էր մարտի սկզբին։ Գրեթե երկու ամիս նա անցկացրել է իր համար վտանգավոր պայմաններում, մինչև մի քանի անհաջող փորձերից հետո որոշում է ընդունվել մասնավոր միջոցների հաշվին նրան բարդ տեղափոխությամբ հասցնել Հյուսիսային ծով։ 

Հետևեք մեզ՝ այստեղ