Հայաստանի կանանց թենիսի հավաքականը հաղթանակ տոնեց

Չեռնոգորիայի Ուլցինժ քաղաքում ապրիլի 11-ից մեկնարկած թենիսի «Fed Cup» մրցաշարի եվրոաֆրիկյան գոտու 3-րդ խմբի «B» ենթախմբի երրորդ տուրից հետո հետագա փուլի ուղեգրից զրկված Հայաստանի կանանց թենիսի հավաքականը հաղթանակով է սկսել 9-12-րդ տեղերի համար պայքարը: «Արմենպրես»-ը հայտնում է, որ ապրիլի 16-ին մրցաշարի 9-12-րդ տեղերի համր պայքար մղող հայ թենիսիստուհիներին դիմակայում էր Մարոկկոյի հավաքականը:

Մարոկկոյի հավաքականի դեմ մրցավեճում առաջինը կորտ էր դուրս եկել Անի Սաֆարյանը, ով 1:6, 0:6 հաշվով զիջել էր Զեյնեբ Էլ Հուարիին: Հայաստանի առաջին ռակետ Անի Ամիրաղյանը 6:0, 6:1 հաշվով հաղթել է Դիաե Էլ Ջարդիին՝ հավասարեցնելով ընդհանուր դիմակայության հաշիվը՝ 1-1:

Հայաստան-Մարոկկո դիմակայության վերջնական հաղթողը որոշվել է զուգախաղում, որտեղ Անի Ամիրաղյան-Լուսինե Չոբանյան խաղազույգը 7:5, 6:0 հաշվով առավելության է հասել Ռիտա Ատիկ-Գհիտա Բենհադի զույգի նկատմամբ:

9-12-րդ տեղերի համար պայքարող մյուս դիմակայությունում՝ Թունիս-Կիպրոս զույգում, մարզական հաջողությունն ուղեկցել է թունիսցիներին, ովքեր հաղթանակով են ավարտել միայն մենախաղերը՝ 2-0 հաշվով հաղթելով մրցակցին (զուգախաղ անցկացնելու կարիք չի եղել):