Ռուսաստանը վիզային ռեժիմ է սահմանել թուրք դիվանագետների համար

Ընթացիկ տարվա ապրիլի 18-ից Ռուսաստան այցելելու համար թուրքական դիվանագետները պետք է նախապես մուտքի արտոնագիր ստանան:

Այս մասին, ինչպես հաղորդում է «Արմենպրես»-ը, հայտնում է «Անատոլու» լրատվական գործակալությունը` նշելով, որ Ռուսաստանի կողմից 2016 թվականի հունվարի 1-ից արտասահմանյան անձնագրեր ունեցող քաղաքացիների համար մտցված սահմանափակումները պետք է տարածվեն նաեւ ծառայողական եւ հատուկ անձնագրեր ունեցող Թուրքիայի քաղաքացիների վրա:

Նշվում է, որ վիզա պետք չի լինի ստանալ այն թուրք քաղաքացիների համար, որոնք Ռուսաստանում ունեն ժամանակավոր կամ մշտական կացության իրավունք:

Ռուսաստանը 2016 թվականի հունվարի 1-ից միակողմանիորեն վերացրել է Թուրքիայի հետ առանց մուտքի արտոնագրի ռեժիմի մասին համաձայնագիրը:

Այդ որուշումն ընդունվել էր ռուսաստանյան Սու-24 ինքնաթիռի` թուրքական օդուժի կողմից խոցվելու հետ կապված երկու երկրների միջեւ հարաբերություններում առաջացած ճգնաժամից հետո:

Այդ միջադեպից հետո Ռուսաստանի նախագահ Վլադիմիր Պուտինը ազգային անվտանգության ապահովման գծով եւ Թուրքիայի նկատմամբ հատուկ տնտեսական միջոցառումների մասին հրամանագիր էր ստորագրել, որն ուժի մեջ է մտել 2016 թվականի հունվարի 1-ից:

Թուրքական կողմը Մոսկվային բազմիցս ուղերձներ է հղել ռուս-թուրքական հարաբերությունները վերականգնելու մասին, սակայն ռուսական կողմը Թուրքիայից պահանջում է պաշտոնապես ներողություն խնդրել Սիրիայի տարածքում ռուսաստանյան ինքնաթիռը խոցելու համար: