«1000 դհոլ» նախագծի «Վերածնունդ» տեսահոլովակի պրեմիերան՝ հաշտության և միասնության ուղերձով

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կոմպոզիտոր և երգահան Արա Գևորգյանի հեղինակային «1000 դհոլ» նախագծի «Վերածնունդ» տեսահոլովակի պրեմիերան կայացավ հուզիչ և խորհրդանշական մթնոլորտում։  Մեծածավալ նախագիծը միավորել էր հանրապետության անվանի դհոլահարներին, դերասաններին, երաժիշտներին ու պարային համույթներին՝ մեկ գաղափարի շուրջ՝ հաշտեցնել, համախմբել և սիրո լեզվով խոսել հասարակության հետ։ 

Tert.am Life-ը ներկա է եղել տեսահոլովակի պրեմիերային ու առանձնացրել կարևոր դրվագները:

«Մշակույթի լեզուն չպետք է լռի։ Երանի մի օր դադարենք իրար ատել ու փոխարենը դառնանք իրար օգնող ու հարգող մարդիկ»,- պրեմիերայի ընթացքում նշեց դերասանուհի Անահիտ Կիրակոսյանը։

Նախագծում ներգրավված են հանրապետության հայտնի դհոլահարներ՝ Գագիկ Հախվերդյանը, Նորայր Շարոյանը, Էֆոն, Ալիկ Փելոշյանը, Նորայր և Շահեն Ավետիսյանները, Մակիչ Նազլուխանյանը, Ռազմիկ Սարգսյանը և բազմաթիվ այլ երաժիշտներ ու մանկավարժներ։ Տեսահոլովակում նկարահանվել են նաև Արմեն Բաբայանն ու Ասքանազ Բաբայանը, իսկ երաժշտական ձևավորման վրա աշխատել են Վահան Նահապետյանն ու Դավիթ Գևորգյանը։

Տեսահոլովակի ռեժիսորը Վահե Յանն է, գլխավոր օպերատորը՝ Արթուր Ղարայանը։ Նախագծին մասնակցել են նաև «1000 Վահան» նախաձեռնության պարային համույթները՝ Հայաստանի սահմանամերձ բնակավայրերից։

Պրեմիերայի ընթացքում Արա Գևորգյանը խոսեց տեսահոլովակի ամենահուզիչ տեսարանների մասին՝ առանձնացնելով Անահիտ Կիրակոսյանի դերակատարումը.

«Այն կերպարը, որ ինձ արտասունք է առաջացնում, Անահիտ Կիրակոսյանի հրաշալի խաղն է։ Նրա դեմքի բարկությունը, զարմանքը, հետո՝ հաշտության ժպիտը, ինձ համար ամենահուզիչ պահերից են»,- նշեց կոմպոզիտորը։

Նա նաև պատմեց, որ նկարահանումների ընթացքում հատկապես կարևորել է երեխաների և նախագծի բոլոր մասնակիցների ներկայությունը կադրում.

«1000 երեխա եկել էր արևի տակ նկարահանման, և ես անընդհատ խնդրում էի, որ նրանց ավելի շատ ցույց տան։ Հասկանում էինք, որ հնարավոր չէ բոլորին ամբողջությամբ ներկայացնել, բայց յուրաքանչյուր մասնակցի ներդրումը շատ կարևոր էր»,- ասաց նա։

Ռեժիսոր Վահե Յանը խոստովանեց, որ նախագիծն իր համար ոչ միայն մասնագիտական, այլև անձնական մեծ փորձություն է եղել.

«Նկարահանումներն իրականում շատ դժվար էին, բայց մենք կարողացանք։ Արա Գևորգյանի հետ աշխատելով՝ ես սկսեցի ավելի լայն մտածել, նույնիսկ կարողացա «ցատկ անել» իմ հնարավորությունների վրայով»,- ասաց ռեժիսորը՝ շնորհակալություն հայտնելով նախագծի բոլոր մասնակիցներին։

Երեկոյի ընթացքում բազմիցս ընդգծվեց, որ «Վերածնունդը» պարզապես երաժշտական տեսահոլովակ չէ, այլ հասարակական ուղերձ՝ ուղղված միասնությանը, հանդուրժողականությանն ու փոխադարձ հարգանքին։

Նախագծի հեղինակները վստահ են՝ մշակույթը կարող է դառնալ այն լեզուն, որը կհաշտեցնի մարդկանց ու նորից կվերադարձնի հասարակության մեջ սիրո և համերաշխության մթնոլորտը։ 

Ավելի վաղ, Արա Գևորգյանն անդրադարձել էր նաև տեսահոլովակի բարդը ընթացքին:

Լուսանկարները՝ Աքսաննա Ոսկանյանի

Հետևեք մեզ՝ այստեղ