ՄԱԿ-ի դատավորը փախստականների ճգնաժամը կառավարելու ԵՄ-ի և Թուրքիայի համաձայնությունը փառահեղ չի համարում

Արդարադատության միջազգային դատարանի դատավոր Ջո Վերհովենը Եվրամիության և Թուրքիայի համաձայնությունը` միասնականորեն կառավարելու փախստականների ճգնաժամը, համարում է ոչ այնքան փառահեղ որոշում, որին այլընտանք, սակայն, այսօր Եվրոպան չունի: Նրա դիտարկմամբ` սա ԵՄ-ի ու այլ կառույցների ձեռնարկած մի շարք նախաձեռնություններից մեկն է, որին հանգել են` փորձելով կարգավորել հարցը: Այս մասին Վերհովենը հայտարարեց «Ընդդեմ ցեղասպանության հանցագործության» գլոբալ ֆորումի ժամանակ: «Եվրամիությունը բազում որոշումներից հետո ի վերջո հասավ այն համաձայնության, որ Թուրքիան դառնա ենթակապալառու փախստականների ճգնաժամը կառավարելու հարցում: Այնքան էլ փառավոր չէ մեր արարքը, բայց ամեն դեպքում, Թուքիային ասացինք ստանձնեք նրանց հանդեպ պարտավորությունները և փոխհատուցում կունենաք»,- «Արմենպրես»-ի փոխանցմամբ` ասաց դատավորը:

Նրա խոսքով` միգրացիոն հոսքերի կառավարման գործում ներդրման համար Թուրքիային  հույս են տալիս, որ այն կմիանա Եվրամիությանը: «Ասել են, որ եթե ընդունեք այս պայմանները, ձեզ տարեկան ֆինասնավորում կտանք ու կսկսենք քննարկել անդամակցության համաձայնագրի որոշ հատվածներ»,-հավելեց Ջո Վերհովենը:

Նա տեղեկացրեց, որ 2015 թվականին ՄԱԿ-ի փաստականների հարցերով գործակալությունների կողմից 627 հազար մարդ է տեղաշարժել Եվրոպա ժամանակավոր ապաստան գտնելու հայցով: Սակայն, նրա խոսքով, միգրացիոն հոսքերը տակնուվրա են անում եվրոպական երկրների տնտեսությունները, որոնց պատրաստ չեն այդ երկրները: