Թաիլանդում արքայադուստր Փատչարա Կիտիյափհայի մահվան պատճառով սուգ է հայտարարվել

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Թաիլանդի կառավարությունը երկրում 15-օրյա սուգ է հայտարարել՝ կապված արքայադուստր Փատչարա Կիտիյափհայի՝ Մահա Վաչիրալոնգկորն թագավորի (Ռամա X) ավագ դստեր մահվան հետ։ Այս մասին հայտնել է թագավորության նախարարների կաբինետի մամուլի ծառայությունը։

«Բոլոր պետական հաստատությունները, ձեռնարկությունները և ուսումնական հաստատությունները պետք է 2026 թվականի հունիսի 12-ից սկսած 15 օրով դրոշներն իջեցնեն մինչև դրոշաձողի կեսը։ Պետական ծառայողները և պետական գերատեսչությունների աշխատակիցները պետք է պահպանեն 15-օրյա սուգը՝ սկսած 2026 թվականի հունիսի 12-ից»,- նշվել է հաղորդագրության մեջ։

Ինչպես հայտնել է թագավորական պալատի բյուրոն, Փատչարա Կիտիյափհան մահացել է հունիսի 11-ին, 47 տարեկան հասակում, Բանգկոկի Չուլալոնգկորն թագավորի անվան Հուշահամալիրային հիվանդանոցում, որտեղ նա անգիտակից վիճակում էր գտնվում 2022 թվականի դեկտեմբերի 15-ից։ Մայիսին բյուրոն տեղեկացրել էր, որ, չնայած բժիշկների ջանքերին, արքայադստեր վիճակը վատացել է կենսական կարևոր օրգանների աշխատանքը խաթարող չվերահսկվող վարակի պատճառով։

Փատչարա Կիտիյափհան 2022 թվականի դեկտեմբերին Նակխոնրատչասիմա նահանգում մարզման ժամանակ կորցրել էր գիտակցությունը, սրտի հիվանդության պատճառով հոսպիտալացվել էր և հետագայում տեղափոխվել մայրաքաղաքի հիվանդանոց։

Արքայադուստրը մինչև 2006 թվականն աշխատել է Նյու Յորքում ՄԱԿ կենտրոնակայանում, Թաիլանդի մշտական ներկայացուցչությունում։ Դրանից հետո նա անցել է աշխատանքի Թաիլանդի Գլխավոր դատախազությունում։ 2012-2014 թվականներին Փատչարա Կիտիյափհան Ավստրիայում դեսպան էր։ Հայրենիք վերադառնալուց հետո նա շարունակել է աշխատել Գլխավոր դատախազությունում մինչև 2021 թվականը, այնուհետև անցել է անձնական թագավորական գվարդիայի շտաբի պետի պաշտոնին։

Հետևեք մեզ՝ այստեղ