Ֆրանսիան իսրայելական BlackCore ընկերությանը կասկածում է տարբեր երկրների ընտրություններին միջամտելու մեջ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Իսրայելական BlackCore ընկերությունը, որը կասկածվում է մարտին Ֆրանսիայում տեղական ընտրություններին միջամտելու մեջ, կարող է առնչություն ունեցած լինել նաև Նյու Յորքի և Շոտլանդիայի ընտրական գործընթացների վրա ազդեցություն գործելուն, ինչպես նաև Անգոլայում ու Տոգոյում իրականացված գործողություններին։ Դրա մասին հայտարարել է ապատեղեկատվության հայտնաբերման ֆրանսիական Viginum ծառայությունը, հաղորդում է Ֆրանսպրես գործակալությունը։

Անցյալ ամիս Reuters գործակալությունը հայտնել էր, որ ֆրանսիական իշխանությունները կասկածում են BlackCore-ին՝ պաղեստինամետ դիրքորոշում ունեցող ձախ արմատական «Աննվաճ Ֆրանսիա» (LFI) կուսակցությունից քաղաքապետի երեք թեկնածուների վարկաբեկման առցանց արշավ կազմակերպելու մեջ։

Հինգշաբթի անցկացված մամուլի ասուլիսում, Ֆրանսիայի վարչապետ Սեբաստիեն Լըկոռնյուի հետ համատեղ, Viginum-ի ղեկավար Մարկ-Անտուան Բրիյանը հայտարարել է, որ տեխնիկական հետաքննությունը հնարավորություն է տվել դուրս գալ BlackCore-ի հետքի վրա։ Ավելի ուշ ծառայությունը մանրամասն զեկույց է ներկայացրել աշխարհի տարբեր երկրներում ընկերության ենթադրյալ գործունեության վերաբերյալ։

Բրիյանը նշել է, որ «գործողությունների այս մոդելը չի սահմանափակվել Ֆրանսիայի տեղական ընտրություններով»։ Նա նշել է, որ համանման գործողություններ, ըստ հետաքննության տվյալների, կարող էին իրականացված լինել Անգոլայում, Տոգոյում, Շոտլանդիայի ընտրություններում և 2025 թվականին Նյու Յորքի տեղական ընտրություններում։

Միևնույն ժամանակ նա ընդգծել է, որ առայժմ պարզված չէ, թե կոնկրետ ով կարող էր լինել նման գործողությունների պատվիրատուն։

«Մեր հետաքննությունները հնարավորություն չեն տվել պարզել պատվիրատուին կամ պատվիրատուներին, եթե այդպիսիք ընդհանրապես գոյություն ունեն, որոնք կանգնած են այս օտարերկրյա թվային միջամտության հետևում»,- հայտարարել է նա։

Ֆրանսիայի վարչապետ Լըկոռնյուն հայտնել է, որ Փարիզը Իսրայելից բացատրություններ է խնդրել BlackCore-ի գործունեության վերաբերյալ, ինչպես նաև աջակցություն՝ վարկաբեկման արշավի հնարավոր պատվիրատուներին պարզելու հարցում։

«Ես ոչ մի վայրկյան չեմ կասկածում, որ եթե ֆրանսիական մասնավոր խումբը Ֆրանսիայի տարածքից միջամտեր Իսրայելի քաղաքական գործընթացներին, նրանց դեսպանին անմիջապես կկանչեին բացատրությունների»,- հայտարարել է նա։

Փարիզում Իսրայելի դեսպանատունը հաստատել է, որ Ֆրանսիան իսկապես հարցում է ուղարկել և սպասում է լրացուցիչ տեղեկությունների՝ սեփական հետաքննությունն անցկացնելու համար։

Դեսպանատան հայտարարության մեջ ընդգծվում է, որ «Իսրայելը, բնականաբար, մտադրություն չունի միջամտել Ֆրանսիայի ներքին քաղաքական գործընթացներին՝ լինի դա համազգային, թե տեղական մակարդակում»։

Հետևեք մեզ՝ այստեղ