Նևադայում կկառուցվի աշխարհի ամենազգայուն ռադիոհեռադիտակը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Caltech-ի հետազոտողները պատրաստվում են Նևադայում կառուցել աշխարհի ամենազգայուն ռադիոհեռադիտակը, որը կկարողանա երկինքը ուսումնասիրել 100 անգամ ավելի արագ, քան աշխարհում գործող ցանկացած այլ ռադիոհեռադիտակ, հայտնում է Fox 5-ը։

Deep Synoptic Array նախագծի կառուցումը հաստատվել է այն բանից հետո, երբ այն անցել է վերջնական նախագծային վերանայումը։ Աստղադիտակը նախատեսվում է կառուցել Նևադայի հեռավոր հովտում։

Համալիրը բաղկացած կլինի 1,650 ռադիոանոթից, որոնցից յուրաքանչյուրի տրամագիծը կլինի մի փոքր ավելի քան 6 մետր։ Այն կտարածվի մոտ 20×16 կիլոմետր տարածքի վրա։ Նախատեսվում է աստղադիտակի կառուցումն ավարտել մինչև 2029 թվականը, որից հետո կմեկնարկեն գիտական աշխատանքները։

Caltech-ի աստղագիտության պրոֆեսոր և նախագծի գլխավոր հետազոտող Գրեգ Հալինանի խոսքով՝ Deep Synoptic Array-ն իր աշխատանքի առաջին հինգ տարիներին մի քանի անգամ կուսումնասիրի տեսանելի ամբողջ երկինքը՝ աննախադեպ արագությամբ։ Նրա խոսքով՝ մինչ այժմ բոլոր ռադիոհեռադիտակները միասին հայտնաբերել են մոտ 20 միլիոն ռադիոաղբյուր, մինչդեռ նոր համակարգը այդ ցուցանիշին կհասնի աշխատանքի առաջին իսկ օրը։

Նախնական ուսումնասիրության ավարտին Deep Synoptic Array-ը կարող է հայտնաբերել շուրջ 1 միլիարդ նոր ռադիոաղբյուր։ Աստղադիտակը կօգնի ուսումնասիրել սև խոռոչները, պուլսարները, արագ ռադիոպոռթկումները, մութ մատերիան, ձգողականությունը, ինչպես նաև տիեզերքի կառուցվածքն ու ընդլայնումը։

Նախագծի համահեղինակ Վիկրամ Ռավիի խոսքով՝ ռադիոաստղագիտությունը «ուրվագծից անցնում է լուսանկարի»։ Նոր համակարգը կկարողանա պատկերներ ստեղծել իրական ժամանակում, որոնք անմիջապես հասանելի կլինեն աշխարհի աստղագիտական համայնքին։

Հետևեք մեզ՝ այստեղ