Վենեսուելայում երկրաշարժերի զոհերի թիվը հասել է 235-ի․ փրկարարները շարունակում են որոնել ողջ մնացածներին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Վենեսուելայում տեղի ունեցած երկու հզոր երկրաշարժերից հետո փրկարարական աշխատանքները շարունակվում են։ Վերջին պաշտոնական տվյալներով՝ զոհերի թիվը հասել է առնվազն 235-ի, իսկ ավելի քան 4300 մարդ տարբեր աստիճանի վնասվածքներ է ստացել։

Երկրաշարժերը տեղի են ունեցել չորեքշաբթի՝ տեղական ժամանակով ժամը 18:04-ին, երբ երկիրը նշում էր ազգային տոնը, ինչի պատճառով շատ քաղաքացիներ գտնվել են իրենց տներում։ Առաջին ստորգետնյա ցնցման ուժգնությունը կազմել է 7,2 մագնիտուդ, իսկ ընդամենը մի քանի վայրկյան անց գրանցվել է երկրորդ՝ ավելի ուժեղ՝ 7,5 մագնիտուդով երկրաշարժը։ ԱՄՆ Երկրաբանական ծառայության (USGS) տվյալներով՝ երկու երկրաշարժերն էլ եղել են մակերեսին մոտ, ինչը զգալիորեն մեծացրել է ավերածությունների մասշտաբը։

Ամենաշատը տուժել են մայրաքաղաք Կարակասը և հարակից Լա Գուայրա քաղաքը, որտեղ բազմաթիվ շենքեր փլուզվել են։ Փլատակների տակից դեռևս լսվում են օգնության կանչեր, իսկ փրկարարները շարունակում են որոնել ողջ մնացածներին։ Իշխանությունները չեն բացառում, որ զոհերի թիվը կարող է շարունակել աճել։

Վենեսուելայի Ազգային ժողովի նախագահ Խորխե Ռոդրիգեսի խոսքով՝ վնասվել կամ ամբողջությամբ ավերվել է առնվազն 250 շենք, որոնց մեծ մասը գտնվում է Լա Գուայրայում։ Միայն Կարակասի Չակաո համայնքում փլուզված շենքերից մեկում հաստատվել է 11 մարդու մահը, իսկ 23 մարդ հաջողվել է փրկել։

Ներքին գործերի նախարար Դիոսդադո Կաբելյոն հայտնել է, որ երկրաշարժերից վնասներ են կրել նաև Տրուխիլիո, Յարակույ, Կարաբոբո, Արագուա և Միրանդա նահանգները։

Երկրի ժամանակավոր նախագահ Դելսի Ռոդրիգեսը հայտարարել է արտակարգ դրություն և տեղեկացրել, որ հիմնական միջազգային օդանավակայանը՝ Մայկետիայի «Սիմոն Բոլիվար» օդանավակայանը, փակվել է լուրջ վնասների պատճառով։ Երկրաշարժերից հետո գրանցվել է նաև առնվազն 30 հետցնցում։

ԱՄՆ Երկրաբանական ծառայությունը զգուշացրել է, որ աղետի իրական հետևանքները դեռևս ամբողջությամբ հայտնի չեն։ Գերատեսչության գնահատմամբ՝ կա 42 տոկոս հավանականություն, որ զոհերի թիվը կարող է գերազանցել 10 հազար մարդուն, և 33 տոկոս հավանականություն, որ այն կարող է անցնել 100 հազարը։ Միաժամանակ մասնագետներն ընդգծում են, որ այս գնահատականները կանխատեսումներ չեն, այլ արտակարգ իրավիճակների արձագանքման համար նախատեսված մոդելային հաշվարկներ։

Մի շարք երկրներ արդեն օգնություն են առաջարկել Վենեսուելային։ ԱՄՆ-ն հայտարարել է 150 միլիոն դոլարի մարդասիրական օգնության մասին և տարածաշրջան է ուղարկում որոնողափրկարարական խմբեր, ռազմատրանսպորտային ինքնաթիռներ և նավեր։ Փրկարարական աշխատանքներին աջակցություն են հայտնել նաև Դոմինիկյան Հանրապետությունը, Էլ Սալվադորը, Մեքսիկան և Կատարը։

Մասնագետների գնահատմամբ՝ սա Վենեսուելայում գրանցված ամենահզոր երկրաշարժերից մեկն է վերջին ավելի քան մեկ դարի ընթացքում և ամենաուժեղը՝ 1900 թվականից ի վեր։ Միաժամանակ շարունակվող հետցնցումները և վնասված ենթակառուցվածքները զգալիորեն բարդացնում են որոնողափրկարարական աշխատանքները։

Թարգմանությունը՝ Անի Վարդանյանի

Հետևեք մեզ՝ այստեղ