Դիլիջանի այսօրն ու վաղը
Անի Սանոսյանը ֆեյսբուքյան իր էջում գրում է.
Այսօր արդեն ակնհայտ է, որ Դիլիջան քաղաքն ու հարակից տարածքները, վերջին տարիներս իրականացվող ծրագրերի շնորհիվ, ամբողջանում են իբրև կրթական, պատմամշակութային, զբոսաշրջային կենտրոն: «ՌՎՎԶ» հիմնադրամը և մի շարք հեղինակավոր անձինք, իրականացնելով մեծածավալ ներդրումներ, հիմնադրել են Դիլիջանի միջազգային դպրոցը, որի հիմնական նպատակն է Հայաստանը վերածել համաշխարհային կրթական կենտրոնի:
ՀՀ կենտրոնական բանկի նախաձեռնությամբ 2013թ. հունվար ամսից իր գործունեությունն է սկսել ՀՀ կենտրոնական բանկի Դիլիջանի ուսումնահետազոտական կենտրոնը, որը ժամանակակից տեխնիկական և տեխնոլոգիական լուծումներով հագեցած կրթական հետազոտական համալիր է: ԱՅԲ հիմնադրամի և ՀՀ կենտրոնական բանկի հետ համագործակցության արդյունքում 2013թ. Դիլիջանի կենտրոնական դպրոցը միացավ «Այբ» դպրոցների ընտանիքին: Տարբեր բնագավառներում խոշոր ներդրումներ և համայնքի զարգացման միջոցառումներ են իրականացնում միջազգային մի շարք կառույցներ, որոնց հեռանկարային նպատակն է խրախուսել քաղաքի տնտեսական և ենթակառուցվածքների աճը:
Չնայած Դիլիջանում զգալի է առանձին ծրագրերի արդյունավետ իրականացման փորձը, սակայն քաղաքի զարգացմանն անհրաժեշտ է ցուցաբերել հեռանկարային և համակարգային մոտեցում: Այդ նպատակով ստեղծվել է «Դիլիջան քաղաքի և հարակից տարածքների զարգացման և ներդրումների խրախուսման մասին» օրենքի նախագիծը, որն հավանության արժանացավ կառավարության ս.թ. հունիսի 10- ի նիստում: Առաջարկվում է Դիլիջանի քաղաքային համայնքն օրենքով հայտարարել քաղաքաշինական գործունեության հատուկ կարգավորման օբյեկտ, որի համար քաղաքաշինական գործունեության կարգը սահմանում է ՀՀ կառավարությունը:
Օրենքի նախագծով ստեղծվում է Դիլիջանի քաղաքաշինական և ներդրումային խորհուրդ, որի նպատակն է միջազգային լավագույն չափորոշիչներին համապատասխան կանոնակարգել և ուղղորդել Դիլիջանի քաղաքաշինական զարգացման միտումները: Օրենքով նախատեսվում է ստեղծել երկարաժամկետ և համակարգային ներդրումներ ներգրավելու մեխանիզմ: Դիլիջանում և հարակից տարածքներում օրենքով կարգելվեն շրջակա միջավայրի վրա բացասական ազդեցություն ունեցող հանքարդյունաբերությունը, էլեկտրաէներգիայի արտադրությունը /բացի արևի, քամու, ընդերքի և կենսազանգվածի էներգիայի օգտագործումից/, քիմիական և այլ արտադրությունները:
Օրենքի ընդունման դեպքում կարձանագրվի օտարերկրյա ներդրումների աճ, ինչը կբարելավի ՀՀ վճարային հաշվեկշիռը, կստեղծվեն նոր աշխատատեղեր, տարածքում կբարձրանա միջին աշխատավարձի մակարդակը, ինչը կհանգեցնի սպառման ծավալների մեծացմանը:
Դիլիջանում հաջողության հասնելու դեպքում համանման ծրագրեր կարելի է իրականացնել նաև Հայաստանի այլ մարզերում:
1
2
3
4
5
1
3
4
5
1
2
3
5
