ՀԱՀ-ում մասշտաբային հակամիգրացիոն բողոքի ցույցեր են բռնկվել

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հարավային Աֆրիկայի խոշորագույն քաղաքներում հազարավոր մարդիկ դուրս են եկել փողոց՝ պահանջելով, որ բոլոր առանց փաստաթղթերի ներգաղթյալները լքեն երկիրը,  հայտնում է BBC News-ը։

Հնարավոր բռնությունները կանխելու համար փողոցներում տեղակայվել են ոստիկանական ուժեր՝ մասնավոր պահնորդական կառույցների աջակցությամբ։ Հակամիգրացիոն խմբերը նախապես երեքշաբթի սահմանել էին որպես վերջնաժամկետ անօրինական ներգաղթյալների հեռանալու համար։

Շատ օտարերկրացիներ արդեն լքել են երկիրը՝ փրկվելով բռնությունից և ահաբեկումներից։ Հարավաֆրիկյան ոստիկանության տվյալներով՝ շուրջ 25 հազար մարդ հայրենադարձվել է, նրանց մեծ մասը՝ աֆրիկյան այլ պետությունների քաղաքացիներ։

Ոստիկանության նախարարությունը հայտարարել է, որ ընդհանուր առմամբ երկրում բողոքի ցույցերն ընթանում են հիմնականում խաղաղ, թեև արձանագրվել են թալանի և կողոպտման փորձերի առանձին դեպքեր։

Երկրի ֆինանսական մայրաքաղաք Յոհանեսբուրգում կենտրոնի խանութները փակվել են, իսկ ոստիկանական ներկայությունն ուժեղացվել է հիմնական փողոցներում։ Հիլբրոու թաղամասում, որտեղ մեծ թվով ներգաղթյալներ են ապրում, ներգրավվել է բանակը այն հաղորդումներից հետո, թե կրակել են դեռահասի վրա և ավտոմեքենա են հրկիզել։ Յոհանեսբուրգի մեկ այլ թաղամասում՝ Յովիլում, ցուցարարները քարեր են նետել՝ կոտրելով տների պատուհանները։

Գերմիստոնում ցուցարարները գնացել են այն տները, որտեղ կասկածել են, թե առանց փաստաթղթերի մարդիկ են բնակվում, վտարել են նրանց և հանձնել ոստիկանությանը՝ պահանջելով ստուգել բնակության կարգավիճակը։

Ոստիկանությունը հայտնել է հինգ մարդու ձերբակալության մասին՝ ամենախոշոր քաղաքային բնակավայրում՝ Սոուետոյում, խանութ թալանելու կասկածանքով։ Եվս մոտ տասը մարդ է ձերբակալվել Կվազուլու-Նատալ նահանգում՝ թալանի, ինչպես նաև հարձակումների ու ահաբեկումների համար։

Դուրբանում փակվել են քաղաքի կենտրոնի ձեռնարկությունները, իսկ ցուցարարներն իշխանություններին են հանձնել իրենց պահանջներով խնդրագրեր։

March and March խմբի առաջնորդ Ջակլինտա Նգոբեզե-Զուման հայտարարել է, որ բողոքի ցույցերը տեղի են ունենալու ամեն շաբաթ՝ վեց ամսվա ընթացքում, որպեսզի հասնեն երկիրն անօրինական ներգաղթյալներից «ազատելուն»։

Operation Dudula շարժման ներկայացուցիչը BBC-ին հայտնել է, որ մասնակիցները մտադիր են «հասնել» առանց փաստաթղթերի օտարերկրացիների ձերբակալություններին։

ՀԱՀ նախագահ Սիրիլ Ռամաֆոսան ցույցերի նախօրեին հանդիպել է դրանց կազմակերպիչների հետ՝ փորձելով նվազեցնել լարվածությունը։ Նա կոչ է արել ակցիաներն անցկացնել խաղաղ ճանապարհով՝ միաժամանակ ընդգծելով միգրացիոն բարեփոխումների անհրաժեշտությունը և հիշեցնելով, որ շատ օտարերկրացիներ երկրում են գտնվում օրինական հիմունքներով և իրենց ներդրումն են ունենում տնտեսության մեջ։

Պաշտոնական տվյալներով՝ երկրում բնակվում է ավելի քան երեք միլիոն գրանցված օտարերկրացի, սակայն անօրինական ներգաղթյալների հստակ թիվն անհայտ է։ Տարեսկզբից ի վեր շուրջ 50 հազար մարդ է ձերբակալվել միգրացիոն օրենսդրությունը խախտելու համար։

ՀԱՀ-ը մնում է Աֆրիկայում միգրացիայի գլխավոր ուղղություններից մեկը 1994 թվականից ի վեր, սակայն գործազրկության բարձր մակարդակը, որն անցնում է 30%-ը, ուժեղացրել է հակամիգրացիոն տրամադրությունները։

Աֆրիկյան մի քանի երկրներ, դրանց թվում՝ Նիգերիան, Գանան, Մալավին, Մոզամբիկը և Զիմբաբվեն, կազմակերպում են իրենց քաղաքացիների վերադարձը։ Իշխանությունները նաև ժամանակավոր ճամբարներ են տեղակայում և մարդկանց տեղափոխում ծագման երկրներ։

Ընդհանուր առմամբ բողոքի ցույցերն անցնում են լարվածության տարբեր աստիճաններով, սակայն իրավապահները նշում են, որ ավանդական զենքերի կիրառումը սահմանափակվում է, իսկ ոստիկանությունն առանձին դեպքերում առգրավում է վտանգավոր առարկաները։

ՀԱՀ-ում հակամիգրացիոն տրամադրությունները հին պատմություն ունեն և երբեմն հանգեցրել են բռնությունների։ Դիտորդների տվյալներով՝ այս տարի արդեն արձանագրվել են զոհեր, իսկ 2008 թվականին բռնության բռնկման ժամանակ ավելի քան 60 մարդ էր զոհվել։

Հետևեք մեզ՝ այստեղ