Ադրբեջանում կես միլիոն վարկառուներ ի վիճակի չեն վերադարձնել պարտքը

Ադրբեջանում բանկերին պարտք 2,6 մլն քաղաքացիների մեկ հինգերորդից ավելին ի վիճակի չեն վերադարձնել վերցրած վարկերը:

Այս մասին, ինչպես հաղորդում է «Արմենպրես»-ը' վկայակոչելով marja.az կայքը, հայտնում է moody's միջազգային վարկանիշային գործակալությունը, որը Ադրբեջանի բանկային հատվածում պրոբլեմային վարկերի տեսակարար կշիռը գնահատել է 20 տոկոս մակարդակի:

«Ադրբեջանում տնտեսական անկման և արժույթի արժեզրկման զուգակցությունը շարունակում է վիժեցնել բանկային համակարգի կայունությունը: Մանաթի արժեզրկումը հանգեցրել է ոչ միայն արտասահմանյան արժույթով ավանդների աճին, այլ նաև բանկերի պրոբլեմային վարկերի աճին: Ներկայում Ադրբեջանում վարկային ներդրունների 20 տոկոսը կազմում են պրոբլեմային վարկերը», -ասվում է գործակալության հայտարարության մեջ:

Fins.az լրատվական կայքն ավելի վաղ հայտնել էր, որ Ադրբեջանը արգելել է վարկային պարտավորությունների հետ կապված երկրից դուրս գալ 115 իրավաբանական և 216 ֆիզիկական անձանց:

Դատարանների կողմից արգելքը սահմանվել է Ադրբեջանի օրեսնդրության պահանջով' վարկառուի կողմից վարկային պարտքերը չմարելու հետ կապված դատարանների որոշումների համաձայն: Դա նշանակում է, որ մինչև ամբողջությամբ չմարեն վարկերը, հիշյալ անձանց չի թույլատրվելու դուրս գալ Ադրբեջանից:

Ադրբեջանի պետական վիճակագրական կոմիտեն պաշտոնական հաղորդագրությամբ հայտնել է, որ 2015 թվականին Ադրբեջանում 40450 աշխատատեղ է փակվել (modern.az):

Պաշտոնական տվյալներով' անցյալ տարի 40450 վերացված աշխատատեղերի 19,2 տոկոսը փակվել է առևտրի, փոխադրամիջոցների վերանորոգման բնագավառում, 15,5 տոկոսը' տրանսպորտի և պահեստային տնտեսության, 8,3 տոկոսը' շինարարության, 6,4 տոկոսը' պետական կառավարման, պաշտպանության և սոցիալական ապահովման, 5,5 տոկոսը' վերամշակող արդյունաբերության, 4,7 տոկոսը' մասնագիտական, գիտական և տեխնիկական գործունեության բնագավառներում:

Ադրբեջանական ԶԼՄ-ների հաղորդումների համաձայն' անցյալ տարվանից նավթի համաշխարհային գների արագորեն նվազման, ադրբեջանական ազգային արժույթի' մանաթի փոխարեժքը 100 տոկոսով ընկնելու հետևանքով, հիմնականում նավթարդյունաբերությունից կախված, Ադրբեջանում փակվել են մեծ թվով պետական  մասնավոր ձեռնարկություններ և հաստատություններ, ինչի հետևանքով վերացվել են հարյուր հազարավոր աշխատատեղեր:

Marja.az լրատվական կայքն ավելի վաղ հայտնել էր, որ 2016 թվականի հունվար-փետրվարին Ադրբեջանի ՀՆԱ-ն 40 տոկոսով նվազել է, Ադրբեջանի արտաքին առևտրաշրջանառությունը մոտ կիսով չափ կրճատվել, Ադրբեջանի տնտեսությունն սկսել է արագորեն անկում ապրել, վարկային փոխառուների թիվը հասել է 2,6 մլն մարդու:

Դա նշանակում է, որ Ադրբեջանի բնակչության յուրաքանչյուր երեքից մեկը պարտք է բանկերին, և խոր տնտեսական ճգնաժամում հայտնված Ադրբեջանում չի բացառվում, որ շուտով բնակչության մեկ երրորդին կարգելվի դուրս գալ երկրից: