Ո՞վ եւ որտե՞ղ է կորցրել ՎՊ նախագահ Իշխան Զաքարյանին

Նկատենք, որ այս անգամ եւս խորհրդարան էր ներկայացել ոչ թե Վերահսկիչ պալատի նախագահը, այլ ՎՊ խորհրդի անդամ Սեյրան Ավագյանը, ով ներկայացրեց 2014 թվականի պետական բյուջեի կատարման տարեկան հաշվետվությունը հաստատելու մասին ՎՊ-ի եզրակացությունը:

Զուրաբյանն իր խոսքում մասնավորապես նշեց. «Հղում կատարելով օրենսդրությանը՝ կարող եմ ասել, որ Վերահսկիչ պալատի նախագահին կարող է փոխարինել տեղակալը` նրա բացակայության կամ պաշտոնական պարտականությունների կատարման անհնարինության դեպքում: Եթե ՎՊ նախագահի պաշտոնը թափուր է, ապա նրա պարտականությունը կատարում է խորհրդի` տարիքով անդամը: Այստեղ է, որ հարց է առաջանում՝ ի՞նչ է պատահել Իշխան Զաքարյանին, պաշտոնական պարտականությունները չկատարելու անհնարինության հանգամանքը պարզվա՞ծ է, թե ոչ»:

Նա նաեւ հավելեց, որ ՎՊ նախագահին մեկ այլ անձով փոխարինելու մասին պաշտոնական տեղեկատվություն չկա. «Որքանով տեղյակ ենք, Իշխան Զաքարյանի պաշտոնի թափուր լինելու մասին որևէ պաշտոնական տեղեկություն չկա: Ուստի, եթե այս հանգամանքներից որևէ մեկը հաստատված չէ՝ ինչո՞ւ է խախտվում օրենքի պահանջը: Հանրությանը տեղեկացրեք, որ հասկանանք Իշխան Զաքարյանի անհետացման առեղծվածը»:

Հնչեցված հարցերին ի պատասխան՝ ԱԺ նախագահ Գալուստ Սահակյանը պատասխանեց. «Ցանկալի կլիներ, որ երբեմն-երբեմն դուք էլ աշխատեիք հանդիպել Իշխան Զաքարյանին: Իսկ այս պարագայում խոսքը ոչ թե Վերահսկիչ պալատի հաշվետվության մասին է, այլ նրա տեսակետի մասին` բյուջեի հաշվետվության վերաբերյալ: Այնպես որ, Ձեր հարցը ճիշտ կլիներ այդ պարագայում»:

Գալուստ Սահակյանը նշեց, թե եթե այդքան ուզում են Իշխան Զաքարյանին հարցեր հղել՝ ինքը կհրավիրի նրան, Իշխան Զաքարյանը Երևանում է, իր աշխատավայրում, դեռ մի բան էլ ավել՝ երեկ հանդիպել է ԱԺ նախագահին:

Orer.am-ի այն հարցին, թե ինչ է նշանակում ՎՊ նախագահի այս պահվածքը, արդյո՞ք առանձնազրույց ունենալով ԱԺ նախագահի հետ եւ չներկայանալով նիստերի դահլիճ՝ Իշխան Զաքարյանը չի արհամարհում ԱԺ պատգամավորներին, Լեւոն Զուրաբյանը պատասխանեց. «Ես չեմ ցանկանում որակավորումներ տալ Իշխան Զաքարյանի այս պահվածքին: Մենք ունենք հստակ պահանջ, որը համապատասխանում է օրենքի կետին: Մենք պահանջում ենք, որ Վերհսկիչ պալատի նախագահը գա եւ ներկայանա: Ո՞վ գիտե, միգուցե նրան արգելել են գալ Ազգային ժողով, միգուցե նա տնային կալանքի տակ է, միգուցե նա իրեն թույլ է տալիս հատուկ մարդկանց հետ միայն հանդիպել, չեմ կարող ասել: Միայն մի բան է պարզ, որ ինչ-որ աննորմալ բան է կատարվում:

Ես, ճանաչելով Իշխան Զաքարյանին, գտնում եմ, որ նա չէր արհամարհի իր սահմանադրական պարտականությունները: Ըստ երեւույթի՝ Իշխան Զաքարյանի վրա հզոր ճնշում են գործադրել»:

Սոսե Չանդոյան

Աղբյուրը՝ Orer.am