ԵՄ-ից Մեծ Բրիտանիայի դուրս գալը կվնասի ամբողջ աշխարհի տնտեսությանը. Օբամայի խորհրդական

Եվրամիությունից Մեծ Բրիտանիայի դուրս գալը կարող Է վնասել ոչ միայն բուն թագավորությանը եւ եվրոպական մյուս երկրներին, այլեւ ամբողջ աշխարհի տնտեսությանը: Այդ մասին, ինչպես տեղեկացնում Է «Արմենպրես»-ը, Handelsblatt գերմանական թերթին տված հարցազրույցում հայտարարել Է ԱՄՆ-ի նախագահին առընթեր Տնտեսական խորհրդատուների խորհրդի ղեկավար Ջեյսոն Ֆերմանը:

«Կարելի Է վիճել այն հարցի շուրջ, թե ԵՄ-ից Մեծ Բրիտանիայի դուրս գալու դեպքում վնասը կլինի փոքր, միջին կամ մեծ,-ասել Է Ֆերմանը:- Բայց այն հաստատ կլինի, առանձնապես Մեծ Բրիտանիայի, ինչպես նաեւ Եվրոպայի եւ համաշխարհային տնտեսության համար»: «Ներկա պահին մեզ հարկավոր չԷ Էլ ավելի մեծ անորոշություն»,- հավելել Է Օբամայի խորհրդականը:

Ավելի վաղ ԱՄՆ-ի 13 նախկին բարձրաստիճան պաշտոնյաներ Times-ում հրապարակված նամակում գրել են, որ Բրիտանիան կկորցնի իր միջազգային ազդեցությունը, եթե դուրս գա Եվրամիությունից: Նախկին պետքարտուղարները, պաշտպանության նախարարներն ու ազգային անվտանգության հարցերով խորհրդականներն ընդգծել են, որ Բրիտանիան չպետք Է հուսա, որ Միացյալ Նահանգների հետ առանձնահատուկ հարաբերությունները նրան կփոխհատուցեն Եվրամիության կորուստը:

Նամակի հեղինակների թվում են՝ նախկին պետքարտուղարներ Մադլեն Օլբրայթը եւ Ջորջ Շուլցը, ինչպես նաեւ Կենտրոնական հետախուզական վարչության նախկին ղեկավար եւ պաշտպանության նախկին նախարար Լեոն Պենետան:

Նրանց խոսքով՝ ԱՄՆ-ին հարկավոր Է ուժեղ Եվրոպա, մինչդեռ ԵՄ-ից Մեծ Բրիտանիայի դուրս գալը կթուլացնի ինչպես երկիրը, այնպես Էլ ամբողջ միությունը:

«Հարկավոր Է հաշվի առնել, որ նույնիսկ մեր երկու երկրների միջեւ հաստատված շատ սերտ հարաբերությունները չեն կարողանա Մեծ Բրիտանիային փոխհատուցել ազդեցության կորուստը եւ 28 պետություններից բաղկացած Եվրամիության անդամության կորուստը, որի տարածքում շուրջ 500 մլն մարդ Է բնակվում»,-ասված Է նամակում:

ԵՄ-ին Մեծ Բրիտանիայի հետագա անդամակցության հարցի շուրջ հանրաքվեն նշանակված Է հունիսի 23-ին, հաղորդել Է ՏԱՍՍ-ը: