ԱՄՆ Պետդեպարտամենտը հորդորում է ամերիկացիներին վերանայել Սաուդյան Արաբիա կատարելիք ուղևորությունները

Չորեքշաբթի գիշերը ԱՄՆ Պետդեպարտամենտը թարմացրել է Սաուդյան Արաբիա այցելել ծրագրող ամերիկացիների համար նախատեսված ուղևորության վերաբերյալ խորհրդատվությունը՝ հորդորելով վերանայել իրենց ծրագրերը՝ հաշվի առնելով Վաշինգտոնի և Թեհրանի միջև շարունակվող հակամարտությունը և տարածաշրջանում եմենցի հութի ապստամբների գործողությունները։

«Սաուդյան Արաբիայի Թագավորություն. 3-րդ մակարդակ՝ վերանայեք ուղևորության անհրաժեշտությունը», - ասված է Պետդեպարտամենտի կայքում տեղադրված նախազգուշացման մեջ։

Հայտարարության համաձայն՝ այս խորհրդատվությունը, ի թիվս այլ գործոնների, պայմանավորված է «ԱՄՆ-ի շահերի ուղղությամբ իրանական անօդաչու թռչող սարքերի և հրթիռների կիրառմամբ հարվածներ հասցնելու վտանգով»։ «Որոշակի տարածքներում վտանգն ավելի բարձր է։ (...) Մի՛ մեկնեք Եմենի հետ սահմանակից շրջաններ՝ ահաբեկչության սպառնալիքի պատճառով», - հավելել է Պետդեպարտամենտը։

Ինչ վերաբերում է բուն Եմենին, որտեղ շարունակվում է հակամարտությունը միջազգայնորեն ճանաչված կառավարության (որին աջակցում է Սաուդյան Արաբիայի գլխավորած կոալիցիան) և «Անսար Ալլահ» շարժման (հութիներ) միջև, Պետդեպարտամենտը պահպանել է «4-րդ մակարդակի» նախազգուշացումը (խորհուրդ չի տրվում որևէ ուղևորություն կատարել), որն ուժի մեջ է անցյալ տարվա դեկտեմբերից։

Անցյալ շաբաթ հութիները հարձակում սկսեցին Եմենի կառավարական ուժերի դեմ՝ իրենց վերահսկողության տակ վերցնելով Եմենի՝ Կարմիր ծովին հարող ողջ ափամերձ գոտին, նաև Բաբ էլ Մանդեբի նեղուցին հարակից տարածքները։ Զուգահեռաբար, հութիները շարունակում են փոխադարձ հարվածներ փոխանակել Սաուդյան Արաբիայի հետ։