Հունաստանը Բուլղարիային կվերադարձնի Սամուիլ ցարի մասունքները. BTA

Հունաստանը Բուլղարիային կվերադարձնի ցար Սամուիլի (958-1014 թթ.) մասունքները։ «Արմենպրես»-ը տեղեկանում է Բուլղարիայի ազգային լրատվական գործակալությունից (BTA), այս մասին սեպտեմբերի 29-ին՝ կառավարության նիստի բացմանը, հայտարարել է վարչապետ Ռումեն Ռադևը։

«Մենք պատմական համաձայնության ենք եկել ցար Սամուիլի աճյունի վերադարձի շուրջ», - ասել է նա՝ հավելելով, որ այդ համաձայնությունը երկու երկրների միջև ակտիվ բանակցությունների արդյունք է։

Ռադևը կոչ է արել բուլղարացիներին հոկտեմբերի 3-ին ներկա գտնվել Սոֆիայի կենտրոնական Բատենբերգի հրապարակում կայանալիք միջոցառմանը՝ նվիրված ցարի աճյունի ժամանմանը, և «հարգանքի տուրք մատուցել բուլղարացի մեծ կառավարչին»։

Նույն օրը առավոտյան Սալոնիկի Բյուզանդական մշակույթի թանգարանում Հունաստանի վարչապետի կողմից կազմակերպված արարողության ժամանակ ցար Սամուիլի աճյունը պաշտոնապես կհանձնվի Բուլղարիայի պետությանը։ Այն «Spartan» ինքնաթիռով կտեղափոխվի Սոֆիա և կտեղադրվի Սուրբ Սոֆիա եկեղեցու սարկոֆագում. հենց այդ եկեղեցում էլ Բուլղարիայի ապագա ցարը մանուկ հասակում ընդունել էր քրիստոնեությունը։

Բուլղարիային կհանձնվեն նաև հայտնաբերված ևս երկու սարկոֆագներում պահվող աճյունները։ Ենթադրվում է, որ դրանք պատկանում են ցար Գավրիիլ Ռադոմիրին և թագավորական ընտանիքի այլ անդամների։

Նիստի ընթացքում կառավարությունը կհաստատի Բուլղարիայի և Հունաստանի միջև համաձայնագրի տեքստը՝ լիազորելով մշակույթի նախարարին այն ստորագրել իր հույն գործընկերոջ հետ միասին:

Վարչապետը նշել է, որ Բուլղարիայի պետության ջանքերը Սամուիլի աճյունը վերականգնելու ուղղությամբ սկսվել են դեռևս 1965 թվականից։ Նա ընդգծել է, որ վեց տասնամյակների ընթացքում Բուլղարիան երբեք չի դադարեցրել ցարի աճյունը վերադարձնելու իր ջանքերը։