ՍԾՏՀ ԽՎ-ի հանձնաժողովի նիստում հայկական պատվիրակություևը արժանի հակահարված է տվել ադրբեջանական սադրանքին

 Սևծովյան տնտեսական համագործակցության երկրների խորհրդարանական վեհաժողովի իրավական և քաղաքական հարցերի մշտական հանձնաժողովի նիստի օրակարգային հարցերից է եղել փախստականների խնդիրը: Հանձնաժողովի նիստն անցկացվել է Հունաստանի մայրաքաղաք Աթենքում մայիսի 22-25-ը: Սևծովյան տնտեսական երկրների խորհրդարանական վեհաժողովում ՀՀ պատվիրակության անդամ Հովհաննես Մարգարյանը, ներկայացնելով հանձնաժողովի աշխատանքները, նշեց, որ հայկ ական կողմը փախստականների թեմայով համապարփակ զեկույց է ներկայացրել, թե ինչ աշխատանքներ են կատարվել Հայաստանում՝ փոխստականների իրավունքների պաշտպանության համար: «Գիտեք, որ մենք ադրբեջանական ագրեսիայի հետևանքով ունեցել ենք շուրջ 500 հազար փախստականներ: Եվ, ըստ էության, մենք բազմաթիվ օրենքներ ենք ընդունել փախստականների իրավունքների պաշտպանության, նրանց կացության իրավունք և քաղաքացիություն տալու մասին և այլն: Մենք այս ամենը մանրամասն ներկայացրել ենք»,- «Արմենպրես»-ի հաղորդմամբ՝ նշեց Մարգարյանը:

Մարգարյանն ընդգծեց, որ հանձնաժողովի նիստի ընթացքում փախստականների թեմայով ադրբեջանական պատվիրակության գրավոր զեկույցում Հայաստանի և Լեռնային Ղարաբաղի մասին որևէ խոսք չկար, սակայն բանավոր ելույթում ադրբեջանցի պատվիրակը սկսել է մեղադրանքներ հնչեցնել Հայաստանի և Լեռնային Ղարաբաղի հասցեին՝ Ադրբեջանում մեծ թվով փախստականների առկայության համար: «Նրանք փորձ էին անում Հայաստանը և Լեռնային Ղարաբաղը դասել ագրեսորների շարքը: Մենք, իհարկե, շատ արագ պետք է հակադարձեինք ադրբեջանական հերթական ավանտյուրային: Ադրբեջանցի պատվիրակի ելույթի ց հետո մենք անմիջապես դիմեցինք հանձնաժողովի նախագահին, որպեսզի մեզ ձայնի իրավունք տա: Մինչև Թուրքիային ձայն տալը մեզ ձայն տրվեց, և մենք հակադարձեցինք ու ասացինք, որ խոսում է մի երկրի ներկայացուցիչ, որը միշտ պատրաստ է սադրանքների և բոլորովին վերջերս էլ դիմել է սադրանքի՝ սանձազերծելով լայնամասշտաբ ռազմական գործողություններ: Մենք միանգամից նրանց դիմակը պատռեցինք՝ ասելով, որ փախստականներ եղել են դեռ 1988թ., երբ տեղի են ունեցել Սումգայիթի ու Բաքվի հայերի ջարդերը: Ես դա որակեցի ոչ այլ ինչ, քան հերթական ցեղասպանություն հայ ժողովրդի նկատմամբ: Ե ս կարծում եմ, որ բոլորի կողմից այդ ամենն ընկալվեց, որովհետև փաստերը բազմապիսի են»,- ասաց Մարգարյանը:

Նա հավելեց, որ իր ելույթից հետո ադրբեջանցի պատվիրակը հայտնվել է վատ վիճակում, քանի որ հայկական պատվիրակությանը հաջողվել է այնքան հիմնավոր ներկայացնել փաստերը, որ ադրբեջանցիները հակադարձելու տեղ չեն ունեցել: «Մեր հակադարձ հարվածը, զուտ մարդկային սկզբունքներից ելնելով, ընդունվեց մնացած երկրների կողմից ...Մեզանից հետո ելույթ ունեցավ Թուրքիայի պատվիրակը, և մենք սպասում էինք, որ թուրք պատվիրակը կպաշտպաներ իր կրտսեր եղբորը, սակայն դա տեղի չունեցավ: Թուրքերն էլ անտարբեր գտնվեցին, իսկ ադրբեջանցիների համար ևս մեկ սառը ցնցուղ էր այն, որ թուրքերի ելույթից հետո հանձնաժողովի նախագահը ներկայացրեց հանձնաժողովի փոխնախագահի ընտրության արդյունքները: Հայտարարվեց, որ հանձնաժողովի նախագահ կրկին ես եմ վերընտրվել»,- ասաց պատգամավորը:

Հանձնաժողովի նիստի ընթացքում քննարկվել են մի շարք հարցեր, որոնք պետք է ընդգրկվեին վեհաժողովի առաջիկա լիագումար նիստի օրակարգում: Հովհաննես Մարգարյանը հայտնեց, որ ադրբեջանական կողմը ներկայացրել է մի շարք առաջարկներ օրակարգային հարցերում լրացումներ կատարելու վերաբեյալ, սակայն դրանք չեն ընդունվել, քանի որ կանոնակարգի համաձայն՝ բոլորը հարցերը պետք է ընդունվեն կոնսենսուսով:

Պատգամավորը կարևոր համարեց նաև նշել Սևծովյան տնտեսական համագործակցության երկրների  խորհրդարանական վեհաժողովի դերը՝ ընդգծելով, որ այն ոչ թե քաղաքական, այլ տնտեսական կառույց է: Նրա խոսքով՝ այն քաղաքական հարցերը, որոնք մշտապես առաջ են քաշում ադրբեջանցիները, չեն ընդունվում: «Չի եղել մի նիստ, որ նրանք նման մի սադրանքի չդիմեն՝ չնայած մշտապես ստացել են արժանի հակահարված: Ժողովրդի լեզվով ասած՝ կողքից որ նայում են, միշտ ասում են՝ «սրանց լավ քացու տակ եք առել»: Այս իրավիճակում կառույցը իսկապես  լուրջ դերակատարում ունի, քանի որ այնտեղ քննարկվում են տնտեսական համագործակցության կարևոր հարցեր»,- եզրափակեց Մարգարյանը: