Էրդողանն ինչքան էլ գոռգոռա` վիզան չեղյալ չի հայտարարվի, մինչեւ Թուրքիան չկատարի բոլոր պայմանները. Գերմանիա

Թուրքիայի եւ Եվրամիության միջեւ թուրք քաղաքացիների առանց վիզայի ԵՄ ճանապարհորդության հարցում անհամաձայնությունը շարունակվում է:

Ինչպես հաղրոդում է «Արմենպրես»-ը` վկայակոչելով Deutsche Welle ռադիոալիքը, Գերմանիայի ներքին գործերի նախարար Թոմաս դե Մեզիրեն այդ առնչությամբ հայտարարել է, որ «եթե վիզայի ազատականցման համար անհրաժեշտ պայմանները կյանքի չկոչվեն, վիզայի ազատականացում էլ չի լինի»:

Թուրքիայի նախագահ Ռեջեփ Թայիփ Էրդողանի կողմից ավելի վաղ արած այն սպառնալիք-հայտարարությունից հետո, որ եթե ԵՄ-ը թուրք քաղաքացիների համար չազատականացնի վիզան` Թուրքիան էլ չեղյալ կհայտարարի փախստականների վերաբերյալ ԵՄ հետ ստորագարծ համաձայնությունը, Գերմանիան էլ է հանդես եկել խիստ հայտարարություններով:

Funke մեդիախմբին տված հարցազրույցում նախարար Թոմաս դե Մեզիրեն, արձագանքելով Էրդողանի այդ հայտարարությանն, ասել է. «Քաղաքականության մեջ պետք չէ ականջ դնել հանրության առաջ արվող պոպուլիստական ճնշումներին»:

Թուրք քաղաքացիների համար ԵՄ մուտքն ազատակացնելու հարցում ԵՄ-ը Թուրքիայից պահանջում է կյանքի կոչել իր կողմից առաջ քաշված բոլոր 72 պայմանները: Սակայն, Անկարան չի ցանկանում բարեփոխումներ կատարել ահաբեկչության դեմ պայքարի թուրքական օրենքում:

Թեմայի առնչությամբ Էրդողանի վերջին հայտարարությանը խստորեն է արձագանքել նաեւ Գերմանիայի արդարադատության նախարար Հայկո Մաասը:

Գերմանական Neuer Osnabrucker Zeitung թերթին այսօր տված հարցազրույցում Մաասը հայտարարել է, որ պետք է հաշվի առնել «ոչ թե Էրդողանի ասածները, այլ նրա կոնկրետ գործողությունները»:

Նշելով, որ Գերմանիան թույլ չի տա իր հետ խոսել շանտաժի լեզվով, Մաաս-ն ասել է. «Վիզայի ազատականացման համար բացահայտ առաջ քաշված պայմաններ կան եւ այդ պայմանները դեռեւս իրագործված չեն»:

Ի պատասխան Էրդողանի հիշյալ հայտարարությանը, Գերմանիայի արդարադատության նախարարն ասել է. «Այս հարցում Էրդողանն ինչքան ցանկանում է թող գոռգոռա: Փախստականներն արդեն այլ ճանապարհներով են աշխատում հասնել ԵՄ: Միգրանտների հարցում մենք պետք է գործենք պատասխանատու կերպ եւ հույսը չդնենք միայն Թուրքիայի հետ ձեռք բերված համաձայնությանը»:

Թուրքիան պահանջել էր, որպեսզի վիզայի ազատականացումը ԵՄ-ը սկսի կյանքի կոչել հունիսից: Դրա դիմաց, բացի վիզայի ազատականուցումից, Անկարան ԵՄ-ից երեք փուլով 9 մլրդ եվրո փոխհատուցում էլ է պահանջել:

Էրդողանի այդ հիստերիկ հայտարարություններին ի պատասխան, ԵՄ-ն առաջ էր քաշել այն այլընտրանքը, որ Մերձավոր Արեւելքից փախստականներին անհրաժեշտ է կենտրոնացնել ԵՄ անդամ Հունաստանում` կատարելով բոլոր անհրաժեշտ գումարային փոխահատուցումներն Աթենքին, եւ Հունաստանում էլ որոշել թե որ միգրանտին պետք է ապաստան տալ, եւ որին հետ ուղարկել իր հայրենիք: