Իսրայելի վարչապետը խոստացել Է միջոցներ ձեռնարկել ի պատասխան Թել Ավիվում կատարված ահաբեկչության

Իսրայելի վարչապետ Բենիամին Նաթանյահուն խոստացել Է պաշտպանողական եւ հարձակողական համալիր միջոցներ ձեռնարկել ի պատասխան Թել Ավիվում կատարված ահաբեկչության, որի հետեւանքով չորս մարդ Է զոհվել: Այդ մասին, ինչպես տեղեկացնում Է «Արմենպրես»-ը, հունիսի 9-ին հայտնել Է «Հաարեց» թերթը:

«Մենք քննարկել ենք պաշտպանողական եւ հարձակողական համալիր միջոցներ, որոնք կձեռնարկենք այդ երեւույթի դեմ, դա միանշանակ մարտահրավեր Է մեզ համար, եւ մենք դրան կպատասխանենք»,-թերթը մեջբերում Է արել վարչապետի ելույթից, որով նա հանդես Է եկել ահաբեկչական գործողության վայր կատարած այցելության ժամանակ:

«Մենք գործելու ենք խստորեն ու խելամտորեն, կհետեւեն անվտանգության կառույցների կոշտ գործողություններ՝ ուղղված ոչ միայն այդ սպանության բոլոր հանցակիցների բացահայտմանը, այլեւ այդօրինակ հետագա գործողությունների կանխմանը»,-ասել Է Նաթանյահուն:

Հունիսի 8-ի երեկոյան զինված երկու պաղեստինցիներ կրակ են բացել «Սորոնա» առեւտրի կենտրոնի այցելուների վրա, որը գտնվում Էր Թել Ավիվի կենտրոնական մասում՝ Իսրայելի պաշտպանության նախարարության շենքերի համալիրի մերձակայքում: Հրաձգության հետեւանքով զոհվել Է չորս մարդ, եւս հինգը ծանր վերքեր են ստացել: Ոստիկանությանը հաջողվել Է ձերբակալել երկու ահաբեկիչներին:

Իսրայելը հունիսի 9-ին արդեն չեղյալ Է հայտարարել երկիր 83 հազար պաղեստինցիների մուտքի թույլտվությունները: «Ռամադանի տոնակատարության շրջանում պաղեստինցիներին տրված բոլոր թույլտվությունները չեղարկված են Թել Ավիվում կատարված ահաբեկչությունից հետո»,-գրել Է «Հաարեց»-ը: Խոսքը վերաբերում Է 83 հազար թուլտվությունների, որոնց մեծ մասը Իսրայելում ազգականներին այցելելու թույլտվություններ են»,-նշում Է հրատարակությունը: Բացի այդ, «Հաարեց»-ի տվյալներով, «չեղարկվածների թվում են նաեւ Գազայի հատվածի բնակիչների համար Երուսաղե մ այցելելու թույլտվությունները»:

Թույլտվությունները չեղարկելու որոշումներն ընդունել են Իսրայելի վարչապետ Բենիամին Նաթանյահուն, պաշտպանության նախարար Ավիգդոր Լիբերմանը եւ իսրայելական բանակի գլխավոր շտաբի պետ Գադի Այզենկոտը լույս հունիսի 9-ի գիշերը պաշտպանության նախարությունում կայացած խորհրդակցության ընթացքում: «Խորհրդակցությունն սկսվել Է այն բանից շատ չանցած, երբ Նաթանյահուն վերադարձել Է Մոսկվայից, որտեղ գտնվում Էր այցով»,-նշում Է «Հաարեց»-ը:

Հունիսի 9-ին, օրվա երկրորդ կեսին, Նաթանյահուն Իսրայելի ռազմաքաղաքական կաբինետի նիստ կանցկացնի Թել Ավիվում կատարված ահաբեկչական գործողության կապակցությամբ: Այդ մասին հայտնել Է հրեական պետության կառավարության ղեկավարի դիվանատունը: «Ռազմաքաղաքական կաբինետի նիստը կկայանա հինգշաբթի, ներկայում պաշտպանության նախարարությունում անվտանգության հարցերի շուրջ խորհրդակցություն Է ընթանում ուժային բլոկի ղեկավարների հետ»,-նշել են կառավարության ղեկավարի գերատեսչությունում, հաղորդել Է ՏԱՍՍ-ը: