Հայ երիտասարդ ըմբիշները Մինսկում կխաղարկեն Հաղթանակի գավաթը

Մինսկի Ալ. Մեդվեդի անվան մարզապալատում Հայրենական մեծ պատերազմում տոնած հաղթանակի 70-ամյակին նվիրված միջոցառումների շրջանակում կկազմակեպվի «Հաղթանակի գավաթ» հունահռոմեական ոճի ըմբշամարտի երիտասարդական միջազգային մրցաշարը:

Ստուգատեսին 8 քաշաքյին կարգերում (50 կգ, 55 կգ, 60 կգ, 66 կգ, 74 կգ, 84 կգ, 96 կգ և 120 կգ) պատրաստվում են մասնակցել Բելառուսի, Հայաստանի, Վրաստանի, Լիտվայի, Ռուսաստանի և Ուկրաինայի երիտասարդական հավաքականները: Յուրաքանչյուր ընտրանու կազմում ընդգրկված կլինեն 8-ական ըմբիշ:

Բուն մրցումները կսկսվեն մայիսի 9-ին՝ Հաղթանակի օրը: Հունահռոմեկան ոճի ըմբշամարտի Հայաստանի երիտասարդական ընտրանու գլխավոր մարզիչ Արմեն Բաբալարյանը հայտնում է, որ Բելառուսի մայրաքաղաքում Հայաստանի մարզական պատիվը կպաշտպանեն հետևյալ 8 ըմբիշները՝ Նորայր Հախոյանը (50 կգ), Սլավիկ Գալստյանը (55 կգ), Տարոն Դումոյանը (60 կգ), Կարեն Ասլանյանը (66 կգ), Արմեն Հակոբյանը (74 կգ), Վարուժան Գրիգորյանը (84 կգ), Հարություն Միքայելյանը (96 կգ) եւ գերծանր քաշային Էդգար Խաչատրյանը:

Այս մասին տեղեկացնում է Հայաստանի ըմբշամարտի ֆեդերացիան:
Ապրիլի վերջին օրերին Հայաստանի երիտասարդական ընտրանու մեկ այլ խումբ էլ ելույթ էր ունեցել Բաթումի Մուխրան Վախթանգաձեի անվան միջազգային մրցաշարում, ուր նրանց հաջողվել էր նվաճել 1 ոսկե, 1 արծաթե ու 4 բրոնզե մեդալ: Աջարիայում 2014 թ. երիտասարդների Եվրոպայի չեմպիոն, 74 կգ քաշային Հրանտ Կալաչյանը դարձել էր ստուգատեսի հաղթող, իսկ Վահե Սարգսյանը (55 կգ) կանգնել էր պատվո պատվանդանի 2-րդ աստիճանին: Խոսրով Ադամյանը, Տիգրան Պետրոսյանը (50 կգ), Կորյուն Ամիրյանն (84 կգ) ու գերծանր քաշային Դավիթ Հովասափյանն արժանացել էին բրոնզե մեդալների: