Թուրքիայի ԵՄ անդամակցությունը տեսանելի ապագայում անհնարին է. The Guardian

 Պարզ ասած` Եվրոպայում ոչ մեկը պատրաստ չէ այժմ կամ էլ տեսանելի ապագայում Թուրքիային ներառել Եվրամիության կազմ:

Այս մասին, ինչպես հաղորդում է «Արմենպրես»-ը, գրում է բրիտանական The Guardian թերթն իր` «Թուրքիայի ԵՄ անդամակցության հնարավորության հարցում իրականությունը երեւակայությունից տարբերելը» վերնագրով հոդվածում:

Թերթը նշում է, որ միանգամայն հիմնավորված են անդամակցության դեպքում 79 մլն թուրքերի միանգամից Եվրոպա մուտք գործելու իրավունքի հետ կապված եվրոպացիների վախերը, քանի որ դեռեւս 1963 թվականին ԵՄ կողմից Թուրքիային տրված անդամակցության հեռանկարի իրականացման հարցում Անկարան ոչ մի ազդանշան չի տվել եւ շարունակում է չտալ:

«Պնդել հակառակն այն բանի, որ Եվրոպայում ոչ մեկը տեսանելի ապագայում պատրաստ չէ Թուրքիային ընդունել ԵՄ կազմ, առնվազն հիմարություն եւ սխալ ուղղորդում է: Նախագահ Թայիփ Էրդողանի գլխավորությամբ Թուրքիայի իշխող «Արդարություն եւ զարգացում» կուսակցության 2002 թվականին իշխանության գալուց հետո Թուրքիայի ԵՄ անդամակցության գործընթացն ամբողջությամբ դադարել է, եւ այդ երկիրը շարժվում է դեպի ավտորիտարիզմ ու իսլամ: Երազանք կմնա նաեւ թուրքերի` ԵՄ առանց վիզայի մուտք գործելու հնարավորությունը, որովհետեւ Թուրքիան ցանկություն չունի կատարելու դրա համար Բրյուսելի առաջադրած 72 պայմանները, այդ թվում` Էրդողանի ռեժիմի կողմից քաղաքական ընդդիմությանը ճնշելու համար կիրառվող ահաբեկչության դեմ պայքարի օրենքի փոփոխությունը», -գրում է թերթը:

Թերթը նաեւ հիշեցնում է, որ Թուրքիայի ԵՄ անդամակցությանը կարող է վետո դնել ԵՄ անդամ յուրաքանչյուր երկիր, ինչը գործնականում անհնարին է դարձնում ԵՄ պահանջներին չհամապատասխանող Թուրքիայի անդամակցությունը միությանը:

Գերմանիայի Կանաչների կուսակցության համանախագահ Ջեմ Օզդեմիրը գերմանական Frankfurter Allgemeine Zeitung թերթին տված հարցարզրույցում հայտարարել է, թե քանի Թուրքիայի առաջնորդը Ռեջեփ Թայիփ Էրդողանն է, այդ երկիրը չի կարող դառնալ Եվրամիության անդամ:

Թուրքիայի` ԵՄ անդամակցության կապակցությամբ Օզդեմիրն ասել է, որ «Եվրոպայում ժողովրդավարական Թուրքիայի նկատմամբ հետաքրքրություն կարող է ծագել միայն երկարաժամկետ հեռանկարում»:

Անդրադառնալով Գերմանիայի իշխող Քրիստոնեադեմոկրատական եւ քրիստոնեասոցիալական` CDU/CSU միացյալ կուսակցությունների կողմից Թուրքիայի հետ անդամակցության դռները բաց լինելու մասին գնահատականին,  Օզդեմիրը հայտարարել է, որ «Թուրքիայի ԵՄ անդամակցության հարցում սխալ է լիիրավ անդամակցության փոխարեն արտոնյալ գործընկերության մասին խոսելը եւս»:

Ջեմ Օզդեմիրը նաեւ քննադատել է ԵՄ հետ Թուրքիայի միջեւ փախստականների ճգնաժամի լուծման հարցում Գերմանիայի վարչապետ Անգելա Մերկելի ջանքերով ստորագրված համաձայնագիրը` անվանելով դա «կարճաժամկետ շահեր հետապնդող»:

«Միացյալ կուսակցությունները շփոթված են Թուրքիային ուղղված քաղաքականություններում: Թուրքիայի նկատմամբ քաղաքականությունը ռազմավարական առումով աղքատ է, իշխող CDU/CSU կուսակցությունները գործում են միայն մարտավարական առումով», -ասել է նա:

Մեծ Բրիտանիայի վարչապետ Դեւիդ Կեմերոնն էլ հայտարարել է, որ Թուրքիան հազիվ թե կարողանա անդամակցել ԵՄ-ին մինչեւ 3000 թվականը: