Մինչև հիմա չեմ հավատում, թե ինչպես կարողացա դա հաղթահարել. Անի Խաչիկյանը նոր աշխատանք ունի

Life.panorama.am-ը գրում է .

«ATV» հեռուստաալիքն  առավոտյան նոր հաղորդում ունի.

«IԱռավոտ»՝ այսպես է կոչվում նոր հաղորդումը, որը կվարեն հաղորդավար, պրոդյուսեր Հովհաննես Թովմասյանն ու դերասանուհի Անի Խաչիկյանը:

Life.panorama.am-ը հաղորդման մանրամասների, որպես հաղորդավարուհի ներկայանալու դժվարությունների և նոր աշխատանքային միջավայրի մասին խոսել է Անի Խաչիկյանի հետ:

-Անի, դուք հեռուստադիտողին ավելի շատ ծանոթ եք գեղարվեստական ֆիլմերից, հեռուստասերիալներից, իսկ հիմա արդեն կներկայանաք որպես հաղորդավարուհի. Կպատմե՞ք առաջարկի և այն ընդունելու՝ Ձեր որոշման մասին:

-Վերջերս «ATV»-ի կողմից ստացա հաղորդումը վարելու առաջարկն ու սիրով ընդունեցի, թեպետ պետք է նշեմ նաև, որ համաձայնվելը մի փորք բարդ էր, քանի որ այս ոլորտում փորձ չունեմ, մտավախություն ունեի՝ կկարողանամ արդյոք, թե ոչ, բայց ինչպես եթերային երկու օրերը փաստեցին, այս փորձությունն էլ կարելի է հաղթահարել և նոր փորձառություն ձեռք բերել:

-Անի, առավոտյան հաղորդում վարելը յուրահատուկ նշանակություն ունի. կարծես թե տվյալ հաղորդումների հաղորդավարների միջոցով է շատերի օրը սկսվում, իսկ մարդկանց բարձր տրամադրություն և օրվա լավ մեկնարկ հաղորդելն այնքան էլ հեշտ գործ չէ, ինչպե՞ս եք գլուխ բերում:

-Իրականում այս ոլորտը բավականին բարդ ու պատասխանատու է, բայց միևնույն ժամանակ, շատ հաճելի: Ինչպես նշեցիք՝ նաև ինձնով է սկսվում մարդկանց օրը, իսկ եթե ես հնարավորություն ունեմ այդ օրը, այդ պահին հեռուստադիտողին դրական էներգիա փոխանցել, ապա դա արդեն մեծ բան է:

-Հաղորդումը հեռարձակվում է ուղիղ եթերում. Հետաքրքիր է, փորձ չունենալով հանդերձ, դժվար չէր արդյոք միանգամից ուղիղ եթեր դուրս գալ:

-Այս հարցին չեմ կարողանա ճիշտ պատասխանել, քանի որ ես էլ մինչև հիմա չեմ հավատում, թե ինչպես կարողացա դա հաղթահարել: Առաջին եթերից ժամեր առաջ շատ անհանգիստ ու լարված էի, բայց երբ հաղորդումը սկսվեց ու վերջացավ, արդեն ուզում էի հասկանալ, թե ինչու էի այդքան հանգիստ ու վստահ: Այսինքն՝ մինչ սկսվելն էի անհանգիստ, բայց ուրախ եմ, որ այդ անհնագստությունը ուղղակի վերացավ, մնաց միայն զարմանքը՝ թե ինչպես ինձ մոտ ստացվեց այս փորձությունը:

-Անի, աշխարհում ընդունված է, որ առավոտյան հաղորդումները ավելի վաղ սկսվեն, բայց դուք եթեր եք դուրս գալիս ժամը 10:00-ին, ժամային փոփոխություն առաջիկայում կլինի՞:

-Եթե նույն Եվրոպայում մարդիկ աշխատանքի հասնելու համար պետք է 1.5 ժամ ճանապարհ գնան, ապա մեր երկրում հաստատ այդպես չէ, բացի այդ՝ հիմա արձակուրդային շրջան է ու ժամը 10:00-ն թողարկումը սկսելու համար նորմալ ժամ է, իսկ սեպտեմբերից հավանաբար որոշակի ժամային փոփոխություններ կլինեն:

-Իհարկե, աշխարհում ընդունված ձևաչափ է, որ երգիչը կարող է զբաղվել նաև դերասանությամբ կամ հաղորդավարությամբ, բայց մեզ մոտ միշտ էլ հայտնվում են մարդիկ, ովքեր քննադատում ու ասում են՝ թող ամեն մեկն իր գործով զբաղվի: Այս առումով քննադատվելու վախ չկա՞:

-Ես անձամբ եմ այդ արտահայտությունը հաճախ օգտագործում և իսկապես համաձայն եմ այդ մտքի հետ, որ ամեն մեկն իր գործով պետք է զբաղվի, բայց ստացվել է այնպես, որ մասնագիտությամբ ես կինոգետ եմ, սակայն մարդկանց շրջանում հայտնի եմ որպես դերասնուհի: Միևնույն ժամանակ, եթե ես չեմ զբաղվում իմ մասնագիտությամբ, դա դեռ չի նշանակում, որ ես լավ չեմ կատարում մյուս աշխատանքները: Ամեն ինչ կախված է մարդու ներքին պատասխանատվությունից և պատրաստակամությունից՝ ստեղծելու որակյալ աշխատանք: Այսօր մասնագիտության «չդերասաններ» ունենք, ովքեր շատ ավելի տաղանդավոր են, քան դիպլոմավոր դերասանները, հետևաբար այստեղ խնդիրը աշխատանքին ամենայն պատասխանատվությամբ մոտենալն է ու արածդ աշխատանքի նկատմամբ ներքին կուլտուրա ունենալը:

-Անի, փաստորեն ամռանը չե՞ք հանգստանա, փոխարենը կաշխատեք ու ամառային տաք օրերին նաև Ձեր ջերմ ժպիտը կհաղորդեք հեռուստադիտողին:

-Չգիտեմ՝ կհաջողվի ամռան ընթացքում թեկուզև կարճատև հանգիստ ունենալ, թե ոչ, բայց եթե անգամ չստացվի, միևնույն է, մեծ սիրով կաշխատենք մեր հեռուստադիտողի համար:

Հեղինակ՝ Անուշիկ Մելքոնյան