Հայտնի է «Ամենախելացին» հեռուստանախագծի առաջին եթերաշրջանի հաղթողի անունը

Blognews.am-ը գրում է.

Այսօր «Արմենիա» հեռուսատաընկերությամբ հեռարձակվող «Ամենախելացին» նախագծի առաջին եթերաշրջանի վերջին հաղորդումն էր, որի ընթացքում պարզ դարձավ հաղթողի անունը: Մինչ նրա անունը նշելն ասեմ, որ Blognews.am–ը հետևել է հաղորդման ողջ ընթացքին: Եզրափակիչ փուլ հասած  մասնակիցները շատ լարված էին, երեխաները յուրաքանչյուր հարցին պատասխանելուց խաչակնքվում էին և ոչ պակաս լարված էին նրանց ծնողները: Սա խաղ է, որտեղ պետք է արագ մտածել և ճիշտ պատասխաններ տալ հնչած հարցերին:

Եզրափակիչ հասած տասներկու մասնակիցներից երկրորդ փուլում պայքարը շարունակեցին վեցը, իսկ արդեն երրորդ փուլում՝ Բարսեղ Աթանյանը, Վահե Դաբաղյանը և Տիգրան Ղլեջյանը մրցում էին առաջինը ճանաչվելու համար: Երեքն էլ գրեթե հավասար միավորներ էին հավաքում, բայց Բարսեղ Աթանյանը գերազանցեց մյուսներին և ճանաչվեց «Ամենախելացին» նախագծի առաջին հաղթողը: Հաղորդավարուհի Նազենի Հովհաննիսյանը հանձնեց վկայականները:

Բարսեղը հաղորդման մասին տեղեկացել էր գովազդից, և ծնողների հորդորով որոշել մասնակցել խաղին .« Ես շատ ուրախ եմ, որ մասնակցեցի այս նախագծին, այստեղ նոր ու շատ լավ ընկերներ եմ ձեռք բերել, որոնց հետ կշարունակեմ ընկերություն անել: Ինձ համար շատ դժվար էր երկրորդ խաղի, երկրորդ փուլը: Ես դեռ չեմ որոշել, թե ինչի վրա կծախսեմ գումարը, բայց որոշել եմ՝ կշարունակեմ ուսումս տեղեկատվական տեխնոլոգիաների գծով: Ես ուզում էի հաղթել, բայց եթե չհաղթեի՝ չէի նեղվի», - նշեց Բարսեղը:

Որդու հաղթանակից չափազանց հուզված էր նաև նրա մայրը՝ Լալա Հակոբյանը, ով դժվարությամբ էր զսպում արցունքները. « Ամբողջ խաղի ընթացքում դահլիճում նստած հուզվում էի նրա համար, իսկ հիմա շատ հպարտ եմ: Տղաս հետաքրքվում է գիտությամբ և շատ լավ հիշողություն ունի»:

Նազենի Հովհաննիսյանը, ով ամբողջ խաղի ընթացքում կարծես ապրում էր բոլոր մասնակիցների հետ, նշեց. « Յուրաքանչյուր մասնակցի դուրս գալուց, կարծես ինձանից մի մասնիկ էր փոկվում: Այնքան ուրախ եմ, որ երեխաներն իրար նկատմամբ  դրական էին տրամադրված, որ որևէ մեկի մոտ հարց չէր առաջանում՝ թե ինչո՞ւ է հաջորդ փուլ անցնում մեկ այլ մասնակից, այլ ոչ թե ինքը: Միանշանակ կարող եմ ասել, որ նախագիծը ստացվեց ավելին քան մենք սպասում էինք։ Այն լավ առումով հեղաշրջում արեց, իսկ ես հուսով եմ, որ երկրորդ եթերաշրջանը կլինի ավելի վառ, գունեղ և հետաքրքիր»:

Նախագծի ընթացքում հաղորդման կողքին էին Կրթության գիտության նախարարությունը և «Տաշիր» բարեգործական հիմնադրամը: Նրանք մասնակիցներին և հաղթողին հանձնեցին շատ կարևոր և ոգևորող մրցանակներ:

Կրթության և գիտության նախարարի մամուլի  քարտուղար Զոհրաբ Եգանյանը նշեց, որ այս նախագիծն արդարացրեց իրեն և ցույց տվեց, որ հայկական դպրոցը կենսունակ է.« Ես վստահ եմ, որ շատ ընտանիքներ անկախ նրանից մասնակցում են իրենց երեխաները նախագծին, թե ոչ, միևնույն է՝ նայել են: Կարող եմ միանշանակ ասել, որ գիրք կարդալը և խելացի լինելը սկսում է դառնալ նորաձև: Կեցցեն մեր երեխաները և մեր ապագա սերունդը: Մենք  մասնակցին տալիս ենք ուղեգիր՝ Մեծ Բրիտանիայում երկշաբաթյա ամառային դպրոց հաճախելու, բայց եթե լիներ հնարավորություն նման պարգևի կարժանացնեինք բոլոր երեխաներին»:  

«Տաշիր» բարեգործական հիմնադրամի ներկայացուցիչ, Կարեն Կարապետյանի գրասենյակի ղեկավար Արտակ Ճաղարյանը նշեց, որ բացի հիմնական հաղթողից մրցանականեր կստանան նաև եզրափակչում հայտնված մյուս մասնակիցները ևս. «Հուլիսի 24-ից օգոստոսի 1-ը երեխաները իրենց հանգիստը կանցկացնեն Վանաձորի Ծիծեռնակ ճամբարում, այնտեղ նրանց համար կկազմակերպվեն տարբեր դասընթացներ, սեմինարներ, որոնք նվիրած կլինեն ազգային, կրոնական արժեքների ճանաչողությանը: Իսկ հաղթողին մեկ միլլիոն դրամի չափով պարգևատրում կտանք»:

Ի ուրախություն շատերի՝ նախագիծը չի սահմանափակվի միայն առաջին եթերաշրջանով. «Այս եթերաշրջանը համարում ենք ավարտված և արդեն սկսել ենք երկրորդ եթերաշրջանի նախապատրաստական աշխատանքները: Նոր ուսումնական տարուն զուգահեռ  մենք կլինենք եթերում և նորից կանցնենք այս ամենի միջով», -եզրափակեց նախագծի գծային պրոդյուսեր Նվեր Ղազարյանը: 

Նյութը՝ Սիրանուշ Գրիգորյանի

Լուսանկարները՝ Կարեն Հովհաննիսյանի