ԵՄ-ը երկրի պարտավորություններին հակասող է կոչել Թուրքիայում ակտիվիստների ձերբակալությունը
Միջազգային
Թուրքիայում իրավապաշտպան կազմակերպության ղեկավարի եւ մի քանի լրագրողի ձերբակալությունը հակասում է այն պարտավորություններին, որոնք Անկարան պետք է կատարի որպես ԵՄ-ի անդամության թեկնածու, ասված է ԵՄ-ի դիվանագիտության ղեկավար Ֆեդերիկա Մոգերինիի եւ հարեւանության եւ ընդլայնման բանակցությունների եվրոհանձնակատար Յոհաննես Խանի հայտարարության մեջ, հայտնում է «ՌԻԱ Նովոստին»:
Երկուշաբթի Թուրքիայում դատարանը միջազգային «Թղթակիցներ առանց սահմանների» կազմակերպության ներկայացուցիչ Էրոլ Օնդերօղլուին եւ Թուրքիայի եւս երկու քաղաքացու «ահաբեկչության քարոզչության» մեղադրանք է ներկայացրել: «Թղթակիցներ առանց սահմանի»-ի ներկայացուցչին մեղադրանքներ են ներկայացվել մայիսին քրդամետ ԶԼՄ-ների հետ «համերաշխության արշավին» ենթադրյալ մասնակցության համար: Մեղադրյալները կալանքի են առնվել:
«Երկուշաբթի Թուրքիայի Մարդու իրավունքների հիմնադրամի նախագահ Շեբնեմ Կորուր Ֆինջանջիի եւ մի քանի լրագրողների, այդ թվում` Էրոլ Օնդերօղլուի եւ Ահմեդ Նեսինի ձերբակալությունը հակասում է Թուրքիայի` հիմնարար իրավունքները, այդ թվում` ԶԼՄ-ների ազատությունն ապահովելու պարտավորությանը: Ենթադրյալ ցանկացած խախտում կամ հանցագործություն պետք է դիտարկվի համապատասխան գործընթացի շրջանակում, անհրաժեշտ է երաշխավորել անմեղության կանխավարկածի սկզբունքի պահպանումը», — հայտնել են Մոգերինին եւ Խանը:
Նրանց խոսքով, ԵՄ-ը բազմիցս հայտարարել է Թուրքիայի կողմից, որպես ԵՄ-ի անդամության թեկնածու երկրի, ԵՄ-ի բարձրագույն ժողովրդավարական ստանդարտները պահպանելու անհրաժեշտությունը:
«Ցանկացած երկիր, որը ԵՄ-ին անդամակցության բանակցություններ է վարում, պետք է երաշխավորի մարդու իրավունքների ապահովումը` Մարդու իրավունքների եվրոպական կոնվենցիային համապատասխան: Ազատ, բազմազան եւ անկախ ԶԼՄ-ները անհրաժեշտ են ցանկացած ժողովրդավարական հասարակության համար», — ասված է հայտարարության մեջ:
Ավելի վաղ Թուրքիայում նման մեղադրանքներ էին ներկայացվել որոշ գիտնականների եւ լրագրողների: Մասնավորապես, անցյալ տարվա սեպտեմբերին Ստամբուլի դատախազությունը հետաքննություն էր սկսել Dogan մեդիախմբի նկատմամբ, որը մեղադրվում էր ահաբեկչական կազմակերպության գործունեության քարոզչության համար:
«Թղթակիցներ առանց սահմաններին» բազմիցս քննադատությամբ է հանդես եկել Թուրքիայի նախագահ Թայյիփ Էրդողանի հասցեին ԶԼՄ-ների աշխատանքի ոլորտում իշխանությունների իրականացրած քաղաքականության հետ կապված:
1
2
3
4
5
1
2
3
4
5
2
3
