Հայկ Պետրոսյանն ու Նարինե Դովլաթյանը տպավորել են ֆրանսիացիներին
Blognews.am-ը գրում է .
Դերասան-երգիչ Հայկ Պետրոսյանն ու երգչուհի Նարինե Դովլաթյանը 2 օր առաջ են վերադարձել Ֆրանսիայից, ուր մեկնել էին գործնական նպատակով։ Ֆրանսիայի Պլեսի Ռոբինսոն քաղաքը Երևանի Արաբկիր վարչական շրջանի գործընկեր քաղաքներից է, ուր էլ պաշտոնական այցով մեկնել էր հայաստանյան պատվիրակությունը։
Պրոդյուսեր Ալեքսանդր Մհերյանը BlogNews-ի հետ զրույցում ասաց, որ քաղաքի տոնի կապակցությամբ էնտեղի քաղաքապետի հրավերով Հայաստանից պետք է ներկայացուցչական խումբ մեկներ, որոնց թվում էին նաև երգիչ երգչուհիներ։ Հայաստանը ներկայացնելու համար ընտրվել են Ֆրանիսայում ապրած դերասան-երգիչ Հայկ Պետրոսյանն ու երգչուհի Նարինե Դովլաթյանը։
«Իրենց ավանդույթներին համաձայն միջոցառումների շարք էին կազմակերպել։ Քաղաքում ստեղծել էին 17-18-րդ դարի տրամադրություն»,- ասաց Ալեքսանդրն ու հավելեց, որ այս դեպքում կարևոր էր այն հանգամանքը, որ հայ արտիստները ելույթ էին ունենում ոչ թե Ֆրանսիայի հայ համայնքի, այլ հենց ֆրանսիացիների համար։ -Նրանք շատ գոհ էին մեր արտիստների ելույթներից, զարմացած էին, չէին սպասում, որ այդչափ տիրապետում են ֆրանսիական մշակույթին, Հայկի դեպքում նաև՝ լեզվին։ Իրենք չէին սպասում, որ այդպիսի արտիստներ ունենք։ Միջոցառումների շրջանակներում տեղի ունեցավ նաև գեղեցկության մրցույթ, որի ժյուրիի կազմում ընդգրկված էր նաև Հայկը»։
Հայկն ու Նարինեն երգել են 2 համերգի ժամանակ։ Նրանք միասին կատարել են «Էրեբունի Երևանը», ինչպես նաև ներկայացրել են «cover»-ներ Շառլ Ազնավուրի, Ռեյ Չարլզի, Էլվիս Փրեսլիի, Զազի, Սելին Դիոնի երգացանկերից։
Ալեքսանդրը նշեց նաև, որ ֆրանսիական կողմը ցանկություն է հայտնել, որ համագործակցությունը շարունակական լինի, և հայ երգիչները պարբերաբար երգեն իրենց քաղաքում հենց ֆրանսիացի լսարանի համար։
6-օրյա շրջագայության ընթացքում նրանք եղել են նաև Փարիզում, Վարշավայում և Վիեննայում։ «Շատ լավ թիմ էինք հավաքվել։Միջոցառումներից առաջ ու հետո նաև զբոսնեցինք, շատ լավ ժամանակ անցկացրինք»,- եզրափակեց Ալեքսանդրը։
Նյութը՝ Ամալյա Հովհաննիսյանի
1
2
3
4
5
4
2
3
4
5
