Ստամբուլի օդանավակայանում ահաբեկչական հարձակման հետևանքով 36 մարդ է զոհվել. Թուրքիան մեղադրում է ԻՊ-ին

Մահապարտ ահաբեկիչները 36 մարդ են սպանել Ստամբուլի Աթաթուրքի անվան օդանավակայանում: Նախնական տվյալներով՝ զոհերի թիվը 50 էր, սակայն հետո Թուրքիայի վարչապետ Բինալի Յիլդիրիմը նշեց, որ զոհերի թիվը 36 է, իսկ վիրավորներինը՝ 150: Երեք ահաբեկիչները նույնպես մահացել են:

 

Ռեուտերսը հայտնում է, որ անմիջապես ոչ մեկ իր վրա չի վերցրել հարձակման պատասխանատվությունը, որը տեղի է ունեցել տեղական ժամանակով երեկոյան 09:00-ին: Դեպքի առիթով վարչապետ Յիլդիրիմը ասել է. «Այս հարձակումը, որը ուղղված է եղել անմեղ մարդկանց, ստոր է և կազմակերպված ահաբեկչություն է»: Նա ասել է, որ նախնական հետազոտությունը մատնանշում է ԻՊ-ին, որպես ահաբեկչության պատասխանատու:

 

Ականատեսները Ռեուտերսին պատմել են, որ երեք ահաբեկիչները օդանավակայան էին ժամանել տաքսիով: Մինչ իրենց պայթեցնելը նրանք կրակ են բացել, և ոստիկանությունը պատասխան կրակով փորձել է նրանց թույլ չտալ հասնել օդանավակայանի ժամանումների դահլիճի անվտանգության գոտի:

 

Ականատեսները պատմում են, որ ահաբեկիչներից մեկը ԱԿ-47 ինքնաձիգով կրակ է բացել ավտոկայանատեղի տարածքում, իսկ այնուհետև պայթեցրել է ինքն իրեն: Երկրորդ ահաբեկիչը իրեն պայթեցրել է միջազգային ժամանումների տարածքում: Երրորդ ահաբեկիչը օդանավակայանի դիմավորողների տարածքում էր և նկատվել էր ոստիկանության կողմից, սակայն վերջիններս չեն կարողացել կանգնեցնել մահապարտին:

 

Ի պատասխան այն հարցին, թե չորրորդ մահապարտը հնարավոր է փախած լինի, վարչապետ Յիլդիրիմը ասել է, որ իրավապահները տեղյակ չեն դրա մասին, բայց չեն բացառում նման հնարավորություն:

 

Թուրքիայի նախագահ Ռեջեփ Թայիփ Էրդողանը իր հայտարարության մեջ նշում է, որ «ահաբեկչական հարձակումները չեն ճանաչում ոչ հավատք, ոչ արժեքներ»: Հարձակումը տեղի է ունեցել մահմեդականների սուրբ Ռամադան տոնի ժամանակ: 

Էրդողանը միջազգային հանրությանը կոչ է արել ամուր դիմադրություն ցույց տալ ահաբեկչությանը ու սատարել Թուրքիային ահաբեկչական խմբավորումների դեմ պայքարում: 

Թուրքիայում այս տարի մի քանի ահաբեկչություններ են տեղի ունեցել, ներառյալ Ստամբուլում տեղի ունեցած երկու մահապարտ հարձակումները, որոնց մեղավորը ԻՊ-ն էր, և երկու՝ մեքենաների միջոցով պայթյունները մայրաքաղաք Անկարայում՝ քրդերի կողմից:

Հարձակումները դարձել են ավելի հաճախակի՝ վախեցնելով զբոսաշրջիկներին ու վնասելով տնտեսությանը, որը զգալիորեն կախված է զբոսաշրջությունից:

 

Սպիտակ Տունը իր հաղորդագրության մեջ սատարել է Թուրքիային: