Ռումինիայի աջակցությամբ Շիրակի մարզի համայնքներից մեկում արևով գործող ջերմոց կկառուցվի

 Ռումինիան 60 հազար դոլար է տրամադրում Հայաստանում Շիրակի մարզի համայնքներից մեկում պասիվ արևային ջերմատուն կառուցելու նպատակով: Հուլիսի 1-ին Հայաստանում Ռումինիայի դեսպան Սորին Վասիլեն և ՄԱԿ-ի գրասենյակի ղեկավար Բրեդլի Բուզետոն համաձայնագիր ստորագրեցին, որով ծրագիրը կիրականացնի ՄԱԿ-ի Զարգացման ծրագիրը:

ՄԱԿ-ի համապատասխան կառույցը նմանատիպ ջերմատուն հիմնելու փորձ արդեն ունի: ՄԱԿ-ի Զարգացման ծրագրի Կլիմայի փոփոխության կենտրոնի նախաձեռնությամբ 2014 թվականին Վայոց ձորի Հորբատեղ համայնքում, որը ծովի մակարդակից 1850 մետր բարձրության վրա է, կառուցվել է արևային էներգիայով աշխատող ջերմատուն: «Այն գործում է գրեթե անվճար, քանի որ չի ծախսում ոչ բնական գազ, ոչ էլեկտրաէներգիա: Ջերմոցն աշխատում է ամբողջ տարին` ապահովելով բերք ու եկամուտ»,-ասված է ջերմատան նկարագրության մեջ:

Ջերմատունը կառուցվել է նորարարական եղանակով` չոր ծղոտի տուկեր, որոնք հերմետիկ փակված են սվաղի հաստ շերտով և հատուկ երկշերտ պոլիէթիլենով: Ջերմոցն աշխատում է կաթիլային ոռոգման համակարգով, որը թույլ է տալիս ապահովել մշտական ջրամատակարարում` ջրի ծախսը հասցնելով նվազագույնի:

«Արմենպրես»-ի հետ զրույցում Ռումինիայի դեսպանը նկատեց, որ իրենց կողմից տրամադրվող աջակցությունն ուղղված է օգնելու հայկական փոքր համայնքներին, որոնք ունեն սահմանափակ հնարավորություններ: «Աջակցությունը Ռումինիայի կառավարության կողմից է տրամադրվում այն շրջաններին, որոնք չունեն մեծ հնարավորություններ: Նախագիծը ենթադրում է ջերմոցների հիմնում, որտեղ գյուղերի մարդիկ կարող են աճեցնել գյուղատնտեսական մշակաբույսեր, կանաչեղեն, որը նրանք կօգտագործեն իրենց կարիքների համար: Սա կօգնի մարդկանց, որ ինքնուր ույն արտադրեն իրենց պահանջմունքները բավարարող մթերքներ, բացի այդ` կստեղծի աշխատատեղեր, որովհետև մարդիկ պետք է աշխատեն: Կհիմնվեն արևի ջերմությամբ աշխատող ջերմոցներ, ինչը կօգնի մարդկանց ամենափոքր ծախսերով, միայն մարդկային ռեսուրսներ ներդնելով, հասնել օգուտի և հոգալ առօրյա հոգսերը»,-ասաց Սորին Վասիլեն:

Նրա խոսքով` ջերմոցի ստեղծած բարիքները կարող են բավարարել մի քանի հարյուր բնակչությամբ մի ամբողջ գյուղի: Ջերմատանն աշխատելու է 4 մասնագետ: Սորին Վասիլեն տեղեկացրեց, որ ֆինանսական աջակցությունը կլինի անհատույց, որով Շիրակի մարզի համայնքներից մեկում (ընտրությունը կկատարվի մոտ ապագայում) կկառուցվի նմանատիպ ջերմոց, ինչ Վայոց ձորի Հորբատեղ համայնքում: