Համակարգչի պատճառով առաջացող ամենատարածված հիվանդությունները

Մեր առօրյան հաճախ դժվար է պատկերացնել առանց համակարգչի, իսկ ժամերով համակարգչի դիմաց նստելը չի կարող անհետևանք մնալ ձեր օրգանիզմի համար։ Նման ապրելակերպի ոչ այնքան հաճելի հետևանքներն են համակարգչային սինդրոմը, մկանների ու հոդերի ադինամիան, որոնք կարող են հանգեցնել այնպիսի տհաճ հետևանքների, ինչպիսիք են՝ օստիոխոնդրոզը, մկանների ատրոֆացումը և անգամ թունելային սինդրոմը, տեսողության վատացումը և այլն։ Այս հիվանդությունները հիմնականում առաջանում են մկանների ու հոդերի վրա գործադրվող անընդհատ լարվածության հետևանքում։

Երբ մեզ թվում է, որ մենք շատ հարմար տեղավորվել ենք համակարգչի փափլիկ աթոռի վրա, իրականում ընդունում ենք խիստ անբնական դիրք, որի արդյունքում մեր ձեռքերն անընդհատ լարված են, երբ  տեքստ ենք հավաքում ստեղնաշարի վրա և անընդհատ ծռում ենք մեր մեջքն ու վիզը։ Ուստի պետք չէ զարմանալ, եթե ձեզ մոտ անակնկալ ի հայտ գան սուր ցավեր մեջքի, վզի և արմունկային հոդերի շրջանում։
Հայտնի են դեպքեր, երբ համակարգչի դեմ երկար նստելուց ողնաշարի սկավառակների խախտում է եղել՝ վզի և գոտկատեղի շրջանում։

Որպեսզի խուսափեք նման տհաճ ու ցավոտ հիվանդություններից, պետք է երբեմն դադարներ անել աշխատանքի ընթացքում։ Եթե աշխատում եք գրասենյակում, ապա հաճախակի դուրս եկեք մաքուր օդի ու կարճ զբոսանքներ արեք, ինչպես նաև պարզ վարժություններ, ինչպիսիք են գլխի պտույտները, իրանի սահուն թեքումներն աջ և ձախ ու մի վախեցեք, եթե ձեր ոսկորները սկսեն ճտճտալ։  Ցանկալի է, որպեսզի նման կարճատև դադարներ արվեն ամեն քառասուն րոպեն մեկ։

Սակայն ամենաշատը համակարգչի դիմաց նստելուց տուժում են աչքերը, իսկ մենք անգամ չենք նկատում այն պահը, որից սկսած մեր տեսողությունն սկսվում է դանդաղորեն վատթարանալ։ Պատճառը, թերևս, այն է, որ մեր աչքերը դադարում են խոնավանալ, երբ տևական ժամանակ հայացքներս չենք կտրում մոնիտորից։ Սա կոչվում է չոր աչքերի էֆեկտ, ինչից առաջանում են աչքերի կարմրում, մազանոթներն սկսում են պայթել, առաջանում են կեղծ կարճատեսության ախտանիշեր, որոնք հետագայում բերում են իրական կարճատեսության։

Կա տարածված կարծրատիպ, որ կոնտակտային ոսպնյակներն ու ակնոցները բուժում են կարճատեսոությունը, բայց իրականում դրանք պարզապես կատարում են աչքերի ֆունկցիաները, երբ դրանք են թերանում դրանց կատարման հարցում։ Որպեսզի զերծ մնալ կարճատեսություն ձեռք բերելու վտանգից, պարզապես պետք է հեռու նստել էկրանից, հաճախակի հայացքը ուղղել այլ կետի վրա, որը չի գտնվում էկրանի վրա, հաճախակի կատարեք օղակաձև և զիգզագաձև շարժումներ ձեր աչքերով և կիրառեք այսպես կոչված «Ճանչ՝ պատի վրա» վարժանքը՝ կենտրոնացնելով ձեր հայացքը հեռավոր պատի վրա գտնվող ինչ-որ մի կետի վրա։

Եթե զգում եք, որ հաճախակի եք սկսել թարթել և տրորել աչքերը, պետք է հետ հենվել աթոռի վրա, մի երկու րոպեով փակել աչքերը և դրանք ծածկել ձեռքերի ափերով։

Համակարգչից առաջացող ամենատհաճ հիվանդությունը, անխոս, թութքն է (գեմոռոյը), որը դարձել է օֆիսային աշխատողների իսկական պատիժը, քանի որ բացի նրանից, որ դրա առաջացման մեծ ռիսկ գոյություն ունի, նաև կա մեծ խնդիր, երբ այդ ցավոտ հիվանդությունը ձեռք բերած մարդիկ ամաչում են գանգատվել բժշկին, և այն զարգանում է մինչև անտանելի դառնալը։ Թութքից խուսափելու համար պարզապես անհրաժեշտ է երբեմն կանգնել ու անընդհատ նստած դիրքում չլինել, կերեք ավելի քիչ կծու, յուղոտ ու աղի ուտելիք, ինչպես նաև խուսափեք ֆասթ ֆուդից և խմեք շատ հեղուկ։