Ներկայացվել են կոնկրետ առաջարկներ, բայց Բաքուն ձեւացնում է, թե չգիտի ինչի մասին է խոսքը. Նալբանդյան

ՆԱՏՕ-ի գագաթաժողովից շրջանակներում ՀՀ նախագահի հանդիպումներում ԼՂ խնդրի շուրջ քննարկումները վերաբերել են այն պայմանավորվածություններին, որոնք ձեռք են բերվել Վիեննայում եւ վերահաստատվել Սանկտ-Պետերբուրգում։ Այս մասին, այսօր՝ հուլիսի 9-ին, Վարշավայում լրագրողների հետ ճեպազրույցում նշել է Հայաստանի ԱԳ նախարար Էդվարդ Նալբանդյանը:

«Այդ պայմանավորվածությունները եթե իրականացվեն, համապատասխան պայմաններ կստեղծվեն, ինչպես որ մենք բազմիցս ասել ենք, խաղաղ գործընթացն առաջ մղելու համար: Եվ գլխավոր թեման հենց սա էր։ Խոսքը, գիտեք, հետաքննության մեխանիզմի ստեղծման մասին է։

Եռանախագահող երկրները ներկայացրել են կոնկրետ առաջարկներ։ Չնայած Ադրբեջանը ձեւացնում է, թե չգիտի ինչի մասին է խոսքը, բայց եռանախագահող երկրները բավական մանրամասն առաջարկներ են ներկայացրել, եւ Հայաստանը արձագանքել է եւ տվել է իր, ընդհանուր առմամբ, դրական կարծիքը այս մեխանիզմի ստեղծման առնչությամբ»,-ասել է Նալբանդյանը՝ հավելելով, որ տարիներ շարունակ այս նախաձեռնությունը քննարկվում է. «Դա եռանախագահող երկրների նախաձեռնությունն էր։ Դեռ 2011, 2012թթ. Ռուսաստանի, Հայաստանի եւ Ադրբեջանի նախագահների` Սոչիում կայացած գագաթաժողովների արդյունքում հրապարակվեցին համապատասխան հայտարարություններ, որոնցում հստակ նշվում էր այս մեխանիզմի ստեղծման անհրաժեշտության մասին, բայց ամեն անգամ Ադրբեջանը հետ քայլ էր կատարում: Այս անգամ եւս Վիեննայից եւ Սանկտ-Պետերբուրգից հետո Ադրբեջանը փորձեր է կատարում հետ կանգնել այդ պայմանավորվածություններից` ձեւացնելով, թե այդպիսի պայմանավորվածություն ընդհանրապես ձեռք չի բերվել։ Չնայած եռանախագահող երկրները Վիեննայի գագաթաժողովի արդունքում հրապարակած իրենց հայտարարության մեջ հստակ ասում էին, որ նախագահները պայմանավորվել են այդպիսի մեխանիզմի ստեղծման մասին»:

Երկրորդը, ըստ ՀՀ ԱԳ նախարարի, այն է, որ վերաբերում է ԵԱՀԿ գործող նախագահի անձնական ներկայացուցչի թիմի հնարավորությունների ընդլայնմանը եւ թվաքանակի ավելացմանը. «Նույն պատմությունն է. չնայած Վիեննայից եւ Սանկտ-Պետերբուրգից բավական ժամանակ է անցել, բայց Ադրբեջանը ամեն կերպ խոչընդոտում է նաեւ այս պայմանավորվածության իրագործմանը: Սրան էին վերաբերում հիմնական քննարկումները: Նաեւ սրա մասին էինք խոսում եռանախագահների հետ։ Վարշավայում երեկ ես նաեւ հանդիպում ունեցա եռանախագահների հետ։ Իրենք եւս գտնվում էին այստեղ: Մենք կարծում ենք, որ այս պայմանավորվածությունների շուրջ մենք շարունակելու ենք քննարկումները. տեսնենք, թե ինչպես կարելի է իրագործել»:

Ամեն դեպքում, Նալբանդյանի խոսքով, եռանախագահող երկրները, ԵԱՀԿ գործող նախագահը` Գերմանիայի արտգործնախարարը, բավական հաստատակամ են: «Եվ պարոն Շտայնմայերը, երբ Հայաստանում էր, դրա մասին ասաց, եւ դրանից առաջ էր նաեւ հայտարարել՝ դեռ հունվարին իր ելույթում. ԵԱՀԿ նախագահությունը ստանձնելու պահին ինքն աջակցեց այս մեխանիզմի ստեղծմանը: Եվ հիմա էլ հաստատակամ են, որ պայմանավորվածությունները պետք է հարգվեն եւ պետք է կատարվեն: Հնարավոր չէ հանդիպումից հանդիպում որեւէ հարցի շուրջ պայմանավորվել, եւ կողմերից մեկը հետ քայլ անի, որովհետեւ դրանով իսկ կորցնում է վստահությունը, որ կարելի է այդ երկրի հետ ընդհանրապես բանակցել եւ ինչ-որ բանի մասին պայմանավորվել»,-ընդգծել է նա: